Umuyobozi wa Komisiyo ishinzwe kurwanya ibyaha by’ubukungu n’imari muri Nigeria, Ibrahim Magu yavuze ko yizera neza ko icyorezo cya Coronavirus giteje impagaragara isi yose ko cyatewe na ruswa.
Ibrahim Magu yatangaje ku wa kabiri tariki ya 11 Gashyantare 2020, mu muhango w’abofisiye bato 281 bari barangije amahugurwa, wabereye mu ishuri rya gisirikare rya Kaduna.
Muri uyu muhango, Magu yafashe ijambo avuga ku miterere y’ikibazo cya ruswa muri iki gihugu ndetse n’ingaruka zacyo, maze abwira Perezida Muhamadu Buhari ati: ” Nyakubahwa, nizera cyane ko na Coronavirus yatewe na ruswa.”
Nyuma yo kumva amagambo ya Magu, bamwe mu banya-Nigeria bamwamaganiye kure, bamufata nk’umuntu udashira mu gaciro. Bamubona nk’umuntu udakwiriye kuba afite inshingano nk’izi mu gihe atangaza amagambo nk’aya.
Nk’uko bigaragara ku rubuga rwa Daily Post, abatanze ibitekerezo ku mbuga nkoranyambaga barashinja Perezida Buhari guha inshingano abantu nka Magu, batuma igihugu gihinduka iciro ry’umugani, kigahora gisekwa n’amahanga.
Ubushakashatsi bwakozwe mu 2019 bwagaragaje ko hari indi Coronavirus nshya yiyongera ku zindi zari zisanzwe zigera muri 6.
Iyi Coronavirus yahawe izina rya COVID-19, bamwe bakayita Novel Coronavirus. Kimwe n’ubundi bwoko bwa Coronavirus, bivugwa ko na yo ishobora kuba yaraturutse mu nyamaswa zo ku gasozi nk’uducurama.
Iyi COVID-19 ni yo iteje inkenke Ubushinwa kuva mu ntangiriro z’ukwezi kwa Mutarama 2020, ingaruka zayo zikaba zimaze gukwira Isi yose ndetse n’Umuryango w’Abibumbye, ishami ryita ku buzima (WHO/OMS) ryemeje ko ari ikibazo cyugarije isi, aho kuba igihugu kimwe.
Imibare mishya ituruka muri Komisiyo y’Ubushinwa ishinzwe ubuzima ivuga ko iki cyorezo kimaze kwica abantu barenga 2200, abarenga 75,400 bakaba bamaze kwandura. Mu minsi ishize byatangajwe ko iki cyorezo kimaze gufata n’abaganga barenga 1700, ubwiganze bw’abapfa ndetse n’abandura bukaba buri mu ntara ya Hubei, cyane cyane mu mugi wa Wuhan, aho iki cyorezo cyavumbuwe.
Kuba Ibrahim Magu yavuze ko Coronavirus yatewe na ruswa birashoboka ko yashakaga kugaragaza ko ruswa igira ingaruka zikomeye ku buzima bw’abaturage n’igihugu, zagereranwa n’icyorezo gihanyayikishije isi nka Coronavirus.
Gusa bitewe n’ingaruka iki cyorezo kimaze guteza ku Isi, abamunenze babona ko ari ibintu bibiri atari akwiye kugereranya, ari yo mpamvu bamufashe nk’uwabivuze atabitekerejeho.
