Ikigo gikora ibikoresho by’ubwirinzi cya Paramount Group cyahaye amakuru ikigo cya Afurika y’Epfo gishinzwe kurwanya ruswa, kirimo gukora iperereza ku bivugwa ko amasosiyete yo muri Leta Zunze Ubumwe z’Abarabu (UAE) byabonye umutungo w’ubwenge mu buryo butemewe w’inganda zicura intwaro muri Afurika y’Epfo.
Iperereza ryibanda ku bakozi b’ibigo byibuze bibiri bikora intwaro bakekwaho guha imitungo y’ubwenge ya gisirikare (IP) amasosiyete ya leta muri UAE.
Lynn Lauth, umunyamategeko wa Paramount, yabwiye OCCRP (Umushinga wiyemeje kugaragaza ibyaha byateguwe na ruswa) ati: “Paramount Group iri gufatanya byimazeyo n’Ishami ryihariye rishinzwe Iperereza (SIU) mu iperereza ryaryo ku makosa bikekwa ko yakozwe n’inzego zigenzurwa na Guverinoma ya UAE, cyane cyane ko bifitanye isano no kwibasira mu buryo butemewe umutungo w’ubwenge mu by’ubwirinzi wa Afurika y’Epfo.”
OCCRP yabonye ibisobanuro bibiri yakuye muri SIU, byibanda cyane cyane ku birego bivuga ko abakozi b’isosiyete ya kabiri, Denel SOC Ltd, “banyereje” umutungo mu by’ubwenge (IP) mu bya gisirikare, ugizwe n’ubushakashatsi n’ibishushanyombonera byifashishwa mu gukora intwaro.
Imwe mu nyandiko zabonywe na OCCRP ni izamurikiwe mu 2023 komisiyo ihoraho y’Inteko Ishinga Amategeko ishinzwe Konti za Leta, mu gihe iyindi ari inyandiko ya power point yerekana ibyavuye mu iperereza mu 2025.
SIU yanze gutanga ibibazo birambuye ku iperereza ryayo, ivuga ko “iha raporo Perezida n’Inteko Ishinga Amategeko gusa.”
Umuvugizi yongeyeho ati: “Ntabwo rero, dushobora kugira ibyo dutangaza mu ruhame, cyangwa ngo dutange ibisobanuro ku iperereza rigikomeje.” Ati: “Icyakora, ni ngombwa kumenya ko ibimenyetso byerekana imyitwarire y’ubugizi bwa nabi byoherejwe mu kigo cy’igihugu gishinzwe ubushinjacyaha.”
Mu gihe Paramount ikorana na SIU mu iperereza, iyi sosiyete nayo yatangije iperereza ryayo bwite kugira ngo hamenyekane niba abakozi baratanze IP ku isosiyete yo muri UAE nyuma y’amasezerano y’ubufatanye yaje gusenyuka.
‘Imyitwarire idakwiye’
Paramount Group ni ikigo gikora intwaro cyashingiwe muri Afurika y’Epfo mu ntangiriro za 90, ubu gifite icyicaro gikuru muri UAE. Isosiyete yatangaje ko yahombye umwaka ushize nyuma yo gutsindwa mu rubanza rw’ubukemurampaka i Londres yaregagamo Abu Dhabi Autonomous Systems Investments Company (ADASI) nk’uko iyi nkuru dukesha defenceweb.co.za ikomeza ivuga.
Ibibazo bya Paramount byatangiye mu 2016 ubwo rimwe mu mashami yayo, Riverston Enterprises Limited, ryinjiraga mu masezerano na ADASI. Umushinga uhuriweho waje gusenyuka nyuma y’uko ADASI yigaruriwe n’ikindi kigo cya Leta ya UAE cyitwa Edge Group, nk’uko bigaragara mu nyandiko z’imbere ndetse n’inyandiko z’urukiko zabonwe na OCCRP.
Mu rwego rw’amasezerano yo gutangiza imishinga ihuriweho, ADASI yari yahaye Paramount inguzanyo ingana na miliyoni 150 z’amadolari, nk’uko inyandiko y’imbere ibigaragaza. Ayo mafaranga yari agamije kwishyura ikiguzi cyo gushinga isosiyete ihuriweho ikora imishinga muri UAE, no kohereza umutungo w’ubwenge ujyanye n’indege yakozwe na Paramount y’iperereza, isosiyete nshya yari guhinduramo indege yo kugaba ibitero yari kwitwa MWARI.
Yaba ADASI na Paramount byombi byemeje ko uwo mutungo mu by’ubwenge utigeze woherezwa muri UAE nk’uko byari biteganyijwe. Ariko mu gihe Paramount ivuga ko itagitegetswe kohereza umutungo mu by’ubwenge mu buryo bwemewe n’amategeko, ADASI ivuga ko ifite uburenganzira ku makuru hakurikijwe icyemezo cy’ubukemurampaka.
Yaba Edge Group, nyiri ADASI, cyangwa abashinzwe kuyivugira, ntabwo basubije ibyifuzo byo gutanga ibisobanuro. Ariko inyandiko yemewe yujujwe na ADASSI mu rubanza rw’igihombo cya Paramount itanga ishusho y’aho ivuga ihagaze.
