Mkuu wa Majeshi ya Ulinzi ya Misri, Luteni Jenerali Ahmed Fathi Ibrahim Khalifa, yuko nchini Rwanda kwa ziara ya kikazi ya siku tatu inayolenga kuimarisha ushirikiano wa kijeshi. Ziara yake ilianza Jumapili tarehe 1 Juni 2025.
Mara baada ya kuwasili nchini Rwanda, Luteni Jenerali Ahmed Fathi Ibrahim Khalifa alipokelewa na mwenzake wa Rwanda, Jenerali MK Mubarakh, ambaye ni Mkuu wa Majeshi ya Ulinzi ya Rwanda (RDF), na pia alitembelea makao makuu ya RDF.
Ziara hii inalenga kuimarisha uhusiano wa kijeshi kati ya majeshi ya Rwanda na Misri. Ni hatua muhimu katika kuboresha ushirikiano hasa katika nyanja za mafunzo, afya ya kijeshi, na maeneo mengine ya kipaumbele.
Luteni Jenerali Ahmed Fathi Ibrahim Khalifa ameambatana na ujumbe kutoka Misri na walipokelewa kwa ukarimu na wenyeji wao wa Rwanda.
Mazungumzo kati ya wakuu wa majeshi wa nchi hizo mbili yalilenga kuendeleza ushirikiano wa kijeshi, kuimarisha mawasiliano, na kuchunguza maeneo mengine ya kushirikiana kwa muda mrefu.
Baada ya mazungumzo hayo, makubaliano ya ushirikiano yalitiwa saini kati ya wakuu hao wa majeshi, yakisisitiza dhamira ya majeshi hayo kushirikiana kwa njia endelevu na yenye manufaa kwa pande zote.
Kabla ya kutembelea Makao Makuu ya RDF, mkuu huyo wa majeshi wa Misri aliwapa heshima wahanga wa mauaji ya kimbari dhidi ya Watutsi ya mwaka 1994 katika Makumbusho ya Mauaji ya Kimbari ya Kigali iliyopo Gisozi.
