Colonel Innocent Kaina wahoze mu buyobozi bw’umutwe wa M23, yasabye Perezida Félix Antoine Tshisekedi wa Repubulika Iharanira Demokarasi ya Congo kwegura by’aka kanya, kuko yananiwe gukemura ibibazo byugarije abanye-Congo.
Ni ubusabe Kaina yatanze biciye mu nyandiko ndende umutwe we wa Coalition Nationale Pour la Libération du Congo (CNLC) wasohoye.
Col. Kaina usanzwe ari Umugaba Mukuru w’Ishami rya Gisirikare ry’uriya mutwe rizwi nka Forces Nationale pour la Libération du Congo (FNLC), yashyize umukono kuri iriya nyandiko igizwe n’amapaji 13.
Abandi bayisinyeho ni Perezida wa CNLC, Dido Manyiroha ndetse n’Umuvugizi wayo mu bya Politiki, Lanican Kayukan Tengo.
Inyandiko ya CNLC igaruka ku bibazo bitandukanye bimaze imyaka myinshi byugarije inzego zose z’ubuzima bw’igihugu cya Congo, haba muri politiki, igisirikare, umutekano, ubutabera, ubukungu ndetse n’imibereho myiza y’abaturage.
Ni ibibazo byose uriya mutwe wa Politiki wagaragaje ubutegetsi bwa Perezida Félix Antoine Tshisekedi nka nyirabayazana yabyo.
Nko ku bijyanye na Politiki n’imiyoborere, Kaina n’umutwe we bashinje Perezidansi ya RDC, Ibiro bya Minisitiri w’Intebe w’iki gihugu n’Inteko Ishinga Amategeko yacyo kuba ari bo bikubira 80% by’amafaranga yose y’ingengo y’imari y’igihugu, ibituma abanye-Congo bisanga mu bukene kuko imishinga yakabateje imbere yose idindira igitangira.
Usibye gucunga nabi umutungo w’igihugu, Kaina yanagaragaje ko ubutegetsi bwa Perezida Tshisekedi bwamunzwe na ruswa no kunyereza umutungo w’igihugu, ibinagera mu nzego z’umutekano za kiriya gihugu avuga ko zamunzwe na ruswa ituma zidashobora guhabwa ibikoresho bigezweho bizifasha kurinda igihugu.
Yashinje kandi ubutegetsi bwa Tshisekedi yise ko bugendera ku moko kuba ahubwo bwifashisha imitwe yitwaje intwaro “mu nyungu za politiki n’iz’abanyapolitiki”.
Col. Innocent Kaina by’umwihariko yakomoje ku mutekano muke uri mu bice bitandukanye byo mu burasirazuba bwa RDC, ahari abaturage barenga miliyoni 5 bo mu ntara za Tanganyika, Maniema, Kivu y’Amajyepfo, iy’Amajyaruguru na Ituri bavuye mu byabo kubera imitwe yitwaje intwaro.
Yanenze Tshisekedi ko nk’Umugaba w’Ikirenga w’Ingabo za RDC ntacyo yigeze akora ngo akumire Jenoside n’ubwicanyi imitwe ya ADF-Nalu, CODECO, FDLR, Mai-Mai, Wazalendo na ba Guverineri ba gisirikare birirwa bakorera abaturage.
Uyu mugabo kandi mu bo yashyize majwi, harimo Guverineri w’Intara ya Ituri, Lt. Gen Johnny Luboya yashinje guhonyora uburenganzira bw’ikiremwamuntu.
Yashinje by’umwihariko uyu Jenerali kuba yarigeze gushyingura abantu 57 bo mu bwoko bw’Abahema ari bazima, aba barimo abagore n’abana ngo bakaba barashyinguwe muri Teritwari ya Djugu ahitwa Katoto ku itegeko rye.
Kaina na CNLC ye, bavuze ko aho kurandura imitwe yitwaje intwaro ikorera muri Congo ahubwo usanga ikorana n’Igisirikare cya RDC mu kwica no gukorera urugomo abaturage.
Yashinje Tshisekedi kandi kuba umutungo kamere wa RDC usahurwa arebera, ananenga uburyo ubutegetsi bwe kuba bukoresha inzego zirimo urw’iperereza mu kwikiza abo atavuga rumwe na bo.
Yanenze kandi kuba ntacyo ubutegetsi bwe bukora ngo bushyire iherezo ku mvugo z’urwango n’izabasira abanyamahanga zikomeje kugaragara muri RDC.
Ibi bibazo cyo kimwe n’ibindi byinshi Col Innocent Kaina n’ishyaka rye bavuga ko bagiye babigaragaza kenshi, gusa Kinshasa ikaba itarigeze na rimwe ibikemura.
Aha ni ho yahereye amenyesha Tshisekedi ko igihe kigeze ngo yegure by’ako kanya.
Yavuze ko kuba hari inzitizi ku miyoborere myiza no kuba “ubutegetsi bwa Tshisekedi burangwa na ruswa kandi bugendera ku moko” bwarananiwe gucunga ibikorwa rusange, ikindi bukaba butagaragaza ubushake bwo kubikemura, bidaha CNLC icyizere cy’uko hari igihe RDC izagera ku iterambere rirambye.
Yakomeje ati: “Ni muri urwo rwego, CNLC imenyesha abanyagihugu n’amahanga urugamba rwayo rukomeye kandi rwiza rugamije guhindura RDC igihugu gishingiye ku musingi w’imiyoborere myiza n’imicungire myiza y’ibikorwa rusange.”
“Ni muri urwo rwego kandi CNLC iteganya gukomeza urugamba rwayo nta gushidikanya, ndetse ikaba isaba Perezida wa Repubulika guhita yegura by’aka kanya, kubera ko atubahirije inshingano ze kandi akaba adatanga icyizere ku baturage ba Congo muri rusange, by’umwihariko ku bo mu burasirazuba bw’igihugu.”
Mu mpera za Werurwe uyu mwaka ni bwo Col. Kaina yashinze CNLC mu rwego rwo gushyira iherezo ku “myitwarire y’ubutegetsi bwa Kinshasa irangwa no kuba butarajwe ishinga n’imibabaro abanye-Congo baterwa n’imiyoborere mibi idashingiye ku ndangagaciro.”
Mu byo Kaina n’umutwe we banenga Leta ya Kinshasa, harimo ruswa, icyenewabo, kugura abo ishaka kwiyegereza, guta muri yombi abantu mu buryo bunyuranyije n’amategeko, itoteza ndetse n’amacakubiri.
