Leta ya Iran yatangaje ko yafunze abantu 22 bakekwaho gukorana n’inzego z’ubutasi za Isirayeli. Nk’uko bitangazwa n’ibitangazamakuru bikorana bya hafi na Leta ya Iran, aba bantu batawe muri yombi mu ntara ya Qom hagati ya tariki ya 13 na 21 Kamena 2025.
Abashinzwe iperereza bavuga ko aba bantu bashinjwa gukorana n’inzego z’ubutasi za Isirayeli mu guhungabanya umutekano w’igihugu no kwamamaza ubutumwa bushyigikira Isirayeli. Iran ivuga ko ibi bikorwa bigamije kubangamira igihugu no guca intege abaturage.
Iyi nkuru ije ikurikira indi yatangajwe n’ubuyobozi bw’Igipolisi cya Iran ku wa Kane, tariki ya 19 Kamena, aho abandi bantu 24 batawe muri yombi bashinjwa ubutasi no kugerageza guharabika igihugu. Iran yanatangaje ko hari Umunyaburayi na we wafashwe akekwaho ubutasi, ariko ntibatangaza igihugu akomokamo.
Iran isanzwe itangaza ko ifata abantu bacyekwaho gukorana n’inzego z’ubutasi z’ibihugu by’iburengerazuba, cyane cyane Isirayeli. Mu byumweru bishize, bamwe muri abo bantu bakatiwe ibihano bikomeye harimo n’ibyo gupfa.
Umuryango Iran Human Rights uvuga ko byibura abantu 223 bamaze gufatwa muri Iran bakekwaho gukorana na Isirayeli, ariko ukavuga ko umubare ushobora kuba uri hejuru kuko amakuru yose ataboneka.
Ibihugu bya Iran na Isirayeli bikomeje kurebana ay’ingwe, buri ruhande rushinja urundi ibikorwa by’ubutasi n’ibitero by’ibanga, ibintu bikomeje gukongeza umwuka mubimu karere.
