Nyuma ya Kenya na Ghana byaherukaga kwiyongera ku bindi bihugu byagaragayemo Coronavirus ku mugabane w’Afurika kuri uyu wa Gatanu na Ethiopia yemeje ko umurwayi wa mbere yagaragaye muri iki gihugu. Minisitiri w’Ubuzima mu gihugu cya Ethiopia, Liya Kebede yatangaje ko umugabo w’Umuyapani uherutse kuza muri Ethiopia aturutse mu gihugu cya Burikinafaso mu cyumweru gishize ari we yaragaweho Coronavirus ubwo bamusuzumaga. Minisitiri Kebede yagize ati:“Turemeza ko umugabo w’imyaka 48 w’Umuyapani twamusanzemo Coronavirus.Uyu ni we wa mbere ugaragaye muri iki gihugu.” Yakomeje avuga ko uyu mugabo wagaragaweho Coronavirus yageze muri Ethiopia mu cyumweru gishize aturutse muri Burikinafaso gusa ubu amerewe neza kuko ari kwitabwaho n’abaganga. Nyuma yo kwaduka kwa Coronavirus mu Mujyi wa Wuhan wo mu gihugu cy’Ubushinwa iyi virusi yamenyekanye nka COVID-19 ubu imaze kugera mu bihugu n’uduce 123. Ethiopia ni igihugu kigendwa cyane kandi kinjiza amafaranga menshi mu bukerarugendo aho butanga imirimo isaga miliyoni 2 mu gihugu hose kandi bugafasha ubukungu bw’igihugu kwinjiza agera kuri miliyali 7.4 y’amadorari y’Amerika bukaba bwariyongereyeho miliyari 2.2 y’amadorari y’Amerika mu kwaka wa 2017. Urubuga Worldometer rugaragaza ko ku isi umubare w’abakekwaho Coronavirus ari 145,682 abo imaze guhitana ni 5,436 naho abagera kuri 72,535 bakaba bamaze gukira iki cyorezo.
