Ijumaa iliyopita, tarehe 27 Juni 2025, Rwanda na Jamhuri ya Kidemokrasia ya Kongo (DRC) walisaini makubaliano ya amani ya kihistoria mjini Washington, yenye lengo la kumaliza vita vinavyoendelea mashariki mwa Kongo.
Makubaliano haya, yaliyowezeshwa na Marekani, yalikuwa yakisubiriwa kwa muda mrefu. Yalisainiwa na Waziri wa Mambo ya Nje wa Rwanda, Olivier Nduhungirehe, na Waziri wa Mambo ya Nje wa Congo, Thérèse Kayikwamba Wagner.
Vipengele Muhimu vya Makubaliano
Makubaliano haya yana vipengele tisa vya msingi:
-
Kuheshimu mamlaka kamili ya DRC na Rwanda na kusitisha mapigano;
-
Usitishaji vita na kuondoa wanajeshi, kunyang’anya silaha, na kuwapokea wanamgambo wasio wa serikali kwa masharti maalum;
-
Kuanzisha mfumo wa pamoja wa ufuatiliaji wa usalama ili kupambana na kundi la waasi la FDLR linalopinga serikali ya Rwanda, na kusitisha msaada wowote wa serikali kwa kundi hilo au washirika wake;
-
Kuwarejesha wakimbizi na wakimbizi wa ndani (IDPs), na kuruhusu shughuli za misaada chini ya usimamizi wa serikali ya DRC;
-
Kusaidia utekelezaji wa jukumu la MONUSCO, ikiwemo kutekeleza azimio la Baraza la Usalama la Umoja wa Mataifa namba 2773, linalotaka Rwanda iondoe wanajeshi wake kutoka DRC, M23 kusitisha mapigano na kuondoka maeneo waliyoyateka, na Rwanda iachane na kuwasaidia;
-
Ushirikiano wa kiuchumi, ukiwemo uwazi zaidi katika biashara ya madini;
-
Kuanzishwa kwa kamati ya pamoja ya utekelezaji na utatuzi wa migogoro, yenye usuluhishi kutoka Umoja wa Afrika, Qatar, na Marekani;
-
Masharti ya mwisho, yakiwemo muda usiojulikana wa makubaliano haya na uwezo wa upande wowote kujitoa baada ya kutoa taarifa ya miezi sita;
-
Makubaliano kuanza kutekelezwa mara moja baada ya kutiwa saini.
Pande zote mbili pia zimeahidi kuunga mkono mazungumzo yanayoendelea kati ya serikali ya Kinshasa na kundi la AFC/M23 chini ya usuluhishi wa Qatar, ambayo yanatarajiwa kuleta mwisho wa kudumu wa vita.
