Umutwe wa AFC/M23 washinje Leta ya Repubulika Iharanira Demokarasi ya Congo kwica abantu bane bo mu bawugize, ibyo wagaragaje nko kugambirira intambara nyamara impande zombi ziri mu biganiro.
Umuvugizi wa AFC/M23, Lawrence Kanyuka, yatangaje ko bariya bantu ingabo za Leta ya RDC zabiciye mu ntara ya Kivu y’Amajyepfo.
Ati: “Ku wa 12 Nyakanga 2025, izi ngabo zishe bene wacu bane muri gurupoma ya Cirunga. Ibi bikorwa bigaragaza neza ko iyi Leta idaha agaciro ibiganiro bikomeje n’imigambi mibi ifite.”
Sosiyete sivile ikorera muri Teritwari ya Kabare yasobanuye ko mu bishwe harimo abarimu babiri bigisha mu ishuri ribanza rya Kabare 1, bari bavuye kuri site yakusanyirijweho ibizamini bya Leta mu gace ka Canya.
Kanyuka kandi yamenyesheje Abanye-Congo n’umuryango mpuzamahanga ko Leta ya RDC ikomeje kurunda ingabo n’intwaro ziremereye hafi y’ibirindiro bya AFC/M23, bica amarenga ko iri kwitegura intambara.
AFC/M23 iteguza ko hashobora kuba intambara mu gihe yo na Leta ya RDC bikomeje ibiganiro biri kubera muri Qatar.
