Umudepite witwa Angelbert Ngendabanka kuri uyu wa 29 Werurwe 2020 yabwiye bamwe mu banyamakuru b’igitangazamakuru cyigenda cyitwa Iwacu ko azabamena impanga bitewe n’inkuru baherutse kumwandikaho.
Ibi biri mu itangazo iki gitangazamakuru cyashyize hanze kivuga ko gitangaza iyo nkuru, cyagendeye ku mahame ngengamyitwarire y’umunyamakuru nko kuvugisha impande zombi zirebwa n’inkuru.
Iwacu.org bavuga ko batunguwe no kumva umuntu uhagarariye abaturage, wagashyigikiye abanyamakuru ndetse n’ihame ry’ubwisanzure bwabo, yihanukira akavuga ko azabica [nk’uko babitangaje] ndetse ngo bazamuregera Umukuru w’Igihugu, Pierre Nkurunziza.
Ntabwo Depite Ngendabanka yashimishijwe n’inkuru bamwanditseho
Tariki ya 23 Werurwe 2020, iki gitangazamakuru cyasohoye inkuru ivuga ku gitero cyagabwe ku baturage babiri bari mu ishyaka rya CNL ritavuga rumwe n’ubutegetsi buriho, batuye ku musozi wa Gashirwe, Komine ya Cendajuru mu Ntara ya Cankuzo, amazu yabo aratwikwa, arakongoka.
Iwacu batangaje ko abaturage bakeka Imbonerakure na Depite Ndendabanka kuba inyuma y’iki gikorwa cy’ubugizi bwa nabi.
Depite Ngendabanka ngo ni we utanga amabwiriza yo gukorera abaturage ibikorwa nk’ibi, ndetse ngo akorana inama n’Imbonerakure. Ngo hari ubwo yigeze kuvuga ko “azarandura Coronavirus iri muri CNL”
Iwacu bavuganye na Depite Ngendabanka ngo agire icyo atangaza ku byo ashinjwa, avuga ko ari ibinyoma bigamije guhindanya isura ye. Yasabye ko abamushinja niba bafite ibimenyetso, bajya kumurego mu nkiko.
Iwacu.org basanzwe bafitanye ikibazo na leta y’u Burundi
Mu Kwakira 2019, abanyamakuru bane ba Iwacu ndetse n’umushoferi batawe muri yombi bagiye gutara amakuru mu Ntara ya Bubanza hari hagabwe igitero n’umutwe urwanya ubutegetsi. Ubuyobozi bw’iki gitangazamakuru ndetse n’imiryango mpuzamahanga byagaragaje ko ari ukuvogera uburenganzira ndetse n’ubwisanzure bw’itangazamakuru ndetse bisaba ko bafungurwa.
Aba banyamakuru ni: Térence Mpozenzi, Agnès Ndirubusa, Egide Harerimana na Christine Kamikazi bakatiwe igifungo cy’umwaka n’igice n’ihazabu ya miliyoni imwe y’Amafaranga y’Amarundi kuri buri umwe, bashinjwa icyaha cy’ubufatanyacyaha mu guhungabanya umutekano w’igihugu nk’uko ubushinjacyaha bwabitangaje, umushoferi wabo Adolphe Masabarakiza agirwa umwere.
Leta y’u Burundi kandi yakomeje gushinjwa kubangamira itangazamakuru, ibirimo BBC na VOA babifungira imiryango. Byavuzwe ko ibitangazamakuru byigenga muri iki gihugu nta ruvugiro bifite, ibigerageza gutangaza ibihabanye n’imyemerere y’ishyaka rya CNDD-FDD bikaba bibuzwa amahwemo. Iwacu.org gifatwa nk’igitangazamakuru cyigenga rukumbi gisigaye mu Burundi.
