Abasirikare babiri bo mu ngabo za Repubulika Iharanira Demokarasi ya Congo (FARDC) n’abapolisi babiri b’iki gihugu, baguye mu mirwano yabasakiranyije n’abarwanyi b’imitwe ya Wazalendo.
Ni imirwano yabaye ejo ku wa Gatanu tariki ya 15 Nyakanga, mu mujyi wa Kindu wo mu ntara ya Maniema. FARDC ivuga ko Wazalendo zisanzwe ziyifasha mu ntambara irwanamo na M23 ari zo zatangije iriya mirwano.
Umuvugizi w’Ibikorwa by’Ingabo za RDC muri Kivu y’Amajyaruguru bizwi nka Sokola 2, Lieutenant Meya Gbe JĂ©rĂ©mie, yatangaje ko usibye bane bapfuye ku ruhande rw’inzego z’umutekano za RDC, hari n’abandi nka bo bakomeretse.
Ku ruhande rwa Wazalendo ngo hishwe batanu, abandi benshi barakomereka.
Imirwano y’impande zombi yadukiye mu gace kitwa Tokolote muri Komine ya Mikelenge, ubwo Wazalendo zari ziyobowe n’uwitwa Amani Huseni JosuĂ© alias Saddam zagabaga igitero kuri delegasiyo yari ihuriweho na FARDC na Polisi ya RDC yari iyobowe na Minisitiri ushinzwe umutekano w’Imbere muri Maniema.
Abo basirikare n’abapolisi ngo bari boherejwe muri kariya gace kugarura ituze no kuganira n’aba Wazalendo bamaze igihe bafite umujinya.
Icyakora ngo ubwo bari mu nzira bisanze baguye mu gico cya bariya barwanyi bari babanje gutera sitasiyo ya Polisi ya Katako bagatwara intwaro; imirwano itangira ubwo.
Lieutenant Meya yamaganye impamvu Wazalendo zigaragaza yo kuba kiriya gitero zarakigabye bitewe n’uko umuhungu w’umuyobozi wazo yatawe muri yombi.
Amakuru avuga ko kugeza ubu mu mujyi wa Kindu umwuka utifashe neza, ndetse muri uyu mujyi hamaze gushyirwaho amasaha ntarengwa yo kuba abantu bamaze kugera mu ngo zabo; ndetse inzego z’umutekano ziri gusaba abaturage kuzifasha kuba maso mu kwirinda ko haduka imvururu.
