Kuri uyu wa 17 Mata 2020, imvura nyinshi yaguye mu mugi wa Uvira mu Ntara ya Kivu y’Amajyepfo yateye umwuzure utwara ubuzima bw’abantu barenga 24, abarenga 45 barakomereka ndetse n’inzu 3500 zirasenyuka.
Aya makuru yemejwe na Guverineri w’iyi ntara, Theo Kasi mu masaha arenga 14 ashize, avuga ko iyi mvura yateje ibibazo birimo kuzura kw’umugezi wa Mulongwe, amazi akwira mu ngo.
Umwe mu baturage uri muri uyu mugi yavuganye na bwiza.com avuga ko imibare yiyongereye ku buryo ngo abapfuye bagera muri 200. Yavuze ko hakomeje igikorwa cyo gushakisha ababuze barengewe cyangwa batwawe n’amazi.
Umukuru w’iki gihugu, Perezida Félix Tshisekedi yihanganishije abagizweho ingaruka b’iki kiza cyahuriranye n’icyorezo cya Covid-19, ati: “Mwihangane. Bavandimwe, muri ibi bihe bikomereye igihugu cyatewe na Covid-19, ntitworohewe n’ibindi nk’ibyabaye mu ijoro muri Uvira.”
Moïse Katumbi uri mu mpuzamashyaka ya LAMUKA itavuga rumwe n’ubutegetsi nawe yababajwe kandi yihanganisha abagizweho ingaruka n’iki kiza. “Uyu munsi n’ejo hashize, Uvira irarira kubera abayo bapfuye kimwe n’izindi ntara zagizweho ingaruka n’imvura. Abagizweho ingaruka tubatuye Imana.”
Katumbi kimwe na Guverineri Kasi barasabira ubufasha abagizweho ingaruka n’iyi mvura. Katumbi ati: “Leta nigire icyo ifasha mu buryo bwihuse kandi bwiza.” Guverineri Kasi we ati: “Ndasaba imiryango nka ONU ko yatanga ubufasha bwihuse ku barokotse iki kiza.”
