Minisiteri y’Ubuzima mu Burundi kuri uyu wa Kabiri yatangaje ko hari abandi bantu batanu bagaragaweho covid-19, mu bipimo 198 byafashwe ku bantu bari bamaranye iminsi n’abandi batanu bari baherutse gusanganwa iyi virusi.
Muri iri tangazo uru rwego rw’ubushakashatsi rukomeje kudatangaza amazina y’abasanganwe ubu bwandu, ruvuga ko hazakomezwa gushakishwa abantu baba barahuye n’abanduye, mu rwego rwo gukomeza gukumira ikwirakwizwa ry’iki cyorezo cyugarije isi.
Nk’uko itangazo rikomeza ribisobanura, abantu batanu ba mbere bari basanganywe virusi ya covid-19, bongeye gupimwa ku matariki ya 18 na 19 Mata basanga batagifite iyi virusi bityo bakaba bararekuwe ngo basubire mu ngo zabo kuwa 21 Mata 2020.
U Burundi bwemeje ko virusi ya covid-19 yageze muri iki gihugu kuwa 31 Werurwe 2020, nubwo imibare y’abarwayi itangazwa ndetse n’igihe yahagereye iki gihugu kitabyemeranywaho n’Umuryango w’Abibumbye.
Kuri ubu u Burundi bwemeza abantu 11 bagaragaweho covid-19, nta mabwiriza abuza abantu gusohoka arafatwa nk’uko biri muri bimwe mu bihugu byo mu karere. Amashuri n’insengero na byo bikomeje ibikorwa byabyo nk’uko bisanzwe. Leta irasaba abaturage gukomeza kunoza umuco w’isuku bakaraba ibiganza hakoreshejwe amazi meza n’isabuni cyangwa umuti wabugenewe.
