Umugabo witwa Dusengumuremyi Amos ndetse n’umugore we, Mukamuyumbu Vestine bari batuye mu Kagari ka Gaseke, Umurenge wa Kabaya mu Karere ka Ngororero kuri uyu wa 17 Kamena 2020 basanzwe mu nzu bapfuye.
Amakuru aturuka muri Ngororero avuga ko urugo rw’aba bombi rwari rwiriwe rukinze kuva mu gitondo, se wa Dusengumuremyi witwa Ntamwemezi Jean Paul agira amakenga, ni ko kwica urugi.
Ntamwemezi yasanze umuhungu we n’umukazana bapfuye, iruhande rw’umurambo w’umugore hari ishoka ndetse afite igikomere mu musaya. Umurambo w’umugabo wo wari mu kindi cyumba, uri mu mugozi.
Aya makuru yahamijwe n’Umunyamabanga Nshingwabikorwa w’Akagari ka Gaseke, Akimana Olive mu kiganiro yagiranye na bwiza.com. Uyu muyobozi avuga ko bikekwa ko Dusengumuremyi yishe Mukamuyumbu. Ababyeyi b’umugabo bavuga ko intandaro yaba ari uko bakekanagaho gucana inyuma.
Imirambo yatwawe ku bitaro bya Kabaya kugira ngo ikorerwe isuzuma.
