Kwiyongera kw’imitwe yitwaje intwaro ya Wazalendo bikomeje gutera ubwoba abaturage bo muri Teritwari ya Shabunda muri Kivu y’Amajyepfo.
Umuryango uharanira uburenganzira bwa muntu ufite icyicaro muri Shabunda, uvuga ko aba barwanyi bigaruriye uduce twinshi, bagakora ibikorwa bibi ndetse by’urugomo.
Bimwe muri ibyo bikorwa harimo iyicwa ry’umugabo i Kikamba, muri Sheferi ya Bakisi. Abatangabuhamya bavuga ko yajugunywe ari muzima mu mugezi wa Mugoma n’abarwanyi ba Wazalendo kubera ko atishyuye “umusoro” kuri bariyeri. Umurambo we nturaboneka.
Imirwano hagati y’imitwe 2 ihanganye
Mu Mudugudu wa Bokulu, muri Sheferi ya Wakabango 1, havutse imirwano hagati y’imitwe ibiri ihanganye ya Wazalendo ku itariki ya 31 Ukwakira nk’uko bitangazwa na ACTUALITE.CD ivuga.
Iyi mitwe yarwaniraga kugenzura ako gace, bituma hafatwa umuyobozi w’umutwe umwe muri iyo mitwe, hamwe n’abarinzi be ba hafi. Imirwano yatumye ingo zigera ku 2.547 zihunga.
