Perezida Umaro Sissoco Embaló wa Guinée-Bissau, kuri uyu wa Gatatu tariki ya 26 Ugushyingo 2025 yatawe muri yombi n’igice cy’abasirikare b’igihugu cye.
Perezida Embaló ubwe ni we wemeje ko yatawe muri yombi, mu kiganiro yahaye Jeune Afrique. Yavuze ko yatawe mu ma saa sita z’amanywa ku isaha y’i Bissau.
Uyu mugabo yatawe muri yombi mu gihe ku Cyumweru gishize ari mu bari bahatanye mu matora y’Umukuru w’Igihugu, ndetse we ubwe yitangaje nk’uwayatsinze ku majwi 65%.
Usibye Perezida, Umugaba Mukuru w’Ingabo za Guinée-Bissau, Gen Biague Na Ntan, Umugaba Mukuru w’Ingabo wungirije, Gen. Mamadou Touré na Minisitiri w’Umutekano w’Imbere mu gihugu, Botché Candé na bo bafatanwe na we.
Perezida Embalò yabwiye Jeune Afrique ko ubwo yatabwaga muri yombi nta rugomo rwigeze ruba, anagaragaza ibyamubayeho nka “Coup d’état” yayobowe n’Umugaba Mukuru w’Ingabo zirwanira ku butaka.
Amakuru aturuka muri Guinée-Bissau avuga ko ku manwa yo kuri uyu wa Gatatu, ku ngoro ya Perezida n’ahakorera Komisiyo y’Igihugu y’amatora humvikanye urusaku rw’amasasu.
Uyu mugabo yatawe muri yombi mu gihe ibyavuye mu matora yo ku Cyumweru byagombaga gutangazwa ejo ku wa Kane.
Usibye Perezida Umaro Sissoco Embalò wigambye intsinzi, uruhande rw’umunyapolitiki Fernando Dias da Costa bari bahatanye na rwo ruravuga ko rwatsinze.
