Umuvugizi wa RIB, Dr Murangira B. Thierry, yabibwiye abanyamakuru ku wa 1 Ukuboza 2025 ko mu myaka itatu ishize, RIB yakiriye ibirego 9 birega Cyprien Uzabakiriho uzwi nka Djihad.
Ku wa 26 Ugushyingo, Djihad na Kwizera Nestor bafashwe na RIB bakurikiranyweho gukwirakwiza amashusho y’ubusambanyi ya Yampano. Bukeye bwaho, dosiye yabo yahise ijyanwa mu bushinjacyaha. Dr Murangira yasobanuye ko dosiye yabo ari inyongera ku ya K John na Ishimwe Patrick kuko ari urubanza rumwe.
Yagaragaje ko izina rikomeye ridashobora kurusha amategeko uburemere. Ati: “N’ubwo ufite izina rikomeye, amategeko ahora hejuru ya byose. Iyo itegeko rikwanze, riragukurikirana nk’abandi bose.”
RIB ivuga ko kuva mu 2022 kugeza mu Ugushyingo 2025 yakiriye ibirego 9 birega Djihad. Muri byo, 6 ni ibirego by’ibyaha, naho 3 ni ibijyanye n’ugusebanya mu mibereho isanzwe.
Dr Murangira yatanze ingengabihe y’uko Djihad yagiye aregwa: 18/03/2022: Yarezwe gutangaza ibihuha dosiye yoherejwe mu bushinjacyaha
06/05/2024: Yarezwe gukangisha no gusebanya akoresheje amafoto y’urukozasoni, dosiye yoherejwe
13/01/2025: Yarezwe ibihuha no gukangisha akoresheje amashusho y’urukozasoni, dosiye yoherejwe
27/10/2025: Yarezwe gutangaza ibihuha, iperereza rirakomeje
13/11/2025: Yarezwe ibihuha, iperereza rirakomeje
09/11/2025: Yarezwe gukangisha akoresheje amashusho y’urukozasoni, iperereza rirakomeje
RIB ivuga ko ibyaha Djihad akurikiranyweho byose bifitanye isano: gutangaza ibihuha cyangwa gukangisha gusebanya. Dr Murangira yavuze ko hari abantu bifuzaga kwihimura ku bandi bakifashisha amashusho y’urukozasoni bakayaha Djihad ngo ayashyire hanze.
Yongeyeho ko yigeze kugirana ikiganiro na Djihad amugira inama yo kugenza make, ariko yakomeje kubirengaho.
