Mu gitondo cyo kuri uyu wa Mbere tariki ya 16 Gashyantare, Inkongi y’umuriro yibasiye ahazwi nko kuri La Bamba mu mujyi wa Gisenyi, itwika inyubako y’ubucuruzi y’uwitwa Ntawangwanabose Theogène.
Iyi nkongi yabereye mu mudugudu wa Irakiza, akagari ka Bugoyi, mu murenge wa Gisenyi w’akarere ka Rubavu.
Ubuyobozi bw’umurenge wa Gisenyi buvuga ko iriya nzu yatangiye gushya mu ma saa yine z’igitondo.
Umunyamabanga Nshingwabikorwa w’Umurenge wa Gisenyi, Uwineza Francine, yasobanuye ko inyubako yahiye yari fite ibice byinshi birimo ahakoreragamo akabari, igice cya resitora, umuryango ukorerwamo ubucuruzi bw’imikino y’amahirwe, ucururizwamo imyenda ihenze na Depo ya sima.
Yagize ati: “Depo ya sima ni yo ya nyir’inzu, ahandi hakoreraga abakodesha. Iyi nyubako n’ubundi twari twarabwiye nyirayo kimwe n’izindi ziyegereye ko zigomba kuvugururwa hakajyamo izijyanye n’icyerekezo cy’umujyi. Uwari ufitemo akabari ni we wasaga n’uwamazemo ibye yimuka, ahandi hose byakongokanye n’inyubako.”
Polisi y’Igihugu biciye mu muvigizi wayo mu ntara y’Iburengerazuba, SP Sylivestre Twajamahoro, yatangaje ko iriya nkongi ikiba yahise itabara ndetse ikaba yashoboye kuzimya umuriro.
SP Twajamahoro yatangaje ko iperereza ryamaze gutangira ari ryo rizagaragaza intandaro y’iriya nkongi ndetse n’ingano y’ibyangijwe na yo.
Gitifu Uwineza icyakora yavuze ko bakeka ko yaba yatewe n'”insinga z’amashayarazi zakoranyeho zigakora sirikwi, umuriro ugafatisha inzu yose.’’
Yavuze ko ikibabaje cyane ari uko yaba inyubako ubwayo n’ibyacururizwagamo,byose nta na kimwe cyagiraga ubwishingizi.
Gitifu wa Gisenyi yaboneyeho gusaba abafite inyubako z’ubucuruzi bose n’abafite ibyo bazicururizamo, kujya bihutira gushaka ubwishingizi, mu rwego rwo kwirinda ibihombo bishobora guturuka ku ngongi cyangwa ibindi biza.
