Intara ya Somaliland yitandukanyije n’igihugu cya Somalia yamaze gufungura ambasade i Yerusalemu, nyuma y’amezi atandatu Israel ibaye igihugu cya mbere kiyemeye nk’igihugu cyigenga.
Ifungurwa ry’iyo ambasade mu gace kiganjemo ibikorwa by’ikoranabuhanga i Yerusalemu y’Uburengerazuba, ryabaye mu gihe Perezida wa Somaliland Abdirahman Mohamed Abdullahi ari mu ruzinduko rw’akazi muri Israel.
Mu nama yagiranye na Perezida wa Somaliland, Minisitiri w’Intebe wa Israel Benjamin Netanyahu yavuze ku mubano wimbitse uri hagati y’abaturage b’impande zombi nk’uko inkuru dukesha BBC ivuga.
Ku rundi ruhande ariko, Somalia ifata Somaliland nk’intara yayo, yasobanuye ibyo biganiro n'”ubutegetsi bwitandukanyije bw’akarere k’amajyaruguru ya Somalia… [nk’] ihonyorwa ry’ubusugire bwayo”.
Kwemerwa na Israel kwa Somaliland, kwabaye mu Kuboza 2025, kwateje impaka. Ibihugu n’imiryango byose hamwe bibarirwa muri za mirongo birimo u Bushinwa, Turkiya, Arabia Saoudite n’umuryango wa Afurika Yunze Ubumwe (AU) banenze icyo cyemezo Israel yafashe.
