Kuri uyu wa Kane ushize, itariki ya 25 Kamena 2026, Urukiko Rukuru rwa Gisirikare rwa Repubulika ya Demokarasi ya Congo rwakoze iburanisha rigufi rya kabiri mu rubanza hagati y’Umushinjacyaha Mukuru w’Igisirikare cya Repubulika ya Demokarasi ya Congo (FARDC) na General Christian Tshiwewe, wahoze ari Umugaba Mukuru wa FARDC akaba n’umujyanama mu bya gisirikare w’umukuru w’igihugu, FĂ©lix Tshisekedi na bagenzi be 9 baniganwa.Â
Ikintu gishya cyagaragaye mu ntangiriro y’uru rubanza rwa kabiri, Perezida wa mbere w’Urukiko Rukuru yatangaje ko, Lt. Gen. Constant Ndima wahoze ari Guverineri wa Kivu y’Amajyaruguru w’umusirikare, yinjiye mu rubanza nk’umucamanza wungirije. Iki cyemezo cyatumye ubushinjacyaha busaba ko yarahira nk’uko bitangazwa na ACTUALITE.CD.
“Nk’uko amategeko abiteganya, mu iburanisha rya mbere….., abagize akanama k’iburanisha badafite umwanya w’ubucamanza bagomba kurahira indahiro iteganyijwe mu ngingo ya 27 y’igitabo cy’amategeko agenga ubutabera bwa gisirikare. Ndasaba rero ko Urukiko Rukuru rwa Gisirikare ruhamagarira umucamanza mushya kurahira indahiro iteganywa n’ingingo yavuzwe,” uyu ni Lt. Gen. Lucien-RenĂ© Likulia wari uhagarariye Ubushinjacyaha Bukuru bwa FARDC.
Perezida wa mbere w’Urukiko Rukuru rwa Gisirikare yasobanuriye muri make umucamanza mushya, Constant Ndima, uko iburanisha ryabanje ryagiye rigenda nk’uko amategeko abiteganya.
Mu magambo ye yagize ati: “Iburanisha rya mbere ryibanze ku kumenya abaregwa no gusoma ibirego baregwa. Uyu munsi, gahunda yari iyo kwinjira mu mizi y’uru rubanza, ariko nasanze abanyamategeko baratanze imbogamizi nyinshi. Ibi bivuze ko tugomba gutangira kumva izo mbogamizi mbere yo gukomeza iburanisha mu mizi”.
Abaregwa bakurikiranweho ibyaha byinshi, birimo: ubugambanyi, ubuhemu, guha ishingiro iterabwoba, gukwirakwiza amakuru y’ibinyoma, kurenga ku mabwiriza, gutorokera mu mahanga, gutunga intwaro n’amasasu byo mu rwego rwa gisirikare mu buryo butemewe n’amategeko, no gushishikariza abasirikare gukora ibikorwa binyuranyije n’inshingano na disipulini.
