Ihuriro ry’ingabo zirwanira ubutegetsi bwa Kinshasa rirashinjwa gutwika ingo z’abaturage ndetse no gusahura imitungo yabo mu gitero cyakoranwe ubugome bukabije ndetse ubuzima bw’abaturage bubigenderamo, ahitwa Lumbishi muri Teritwari ya Kalehe muri Kivu y’Amajyepfo.
Nk’uko byatangajwe na AFC/M23 mu itangazo ry’Umuvugizi Lawrence Kanyuka, ngo ni igitero cyateguwe kandi gikoranwa ubugome ndengakamere.
Yagize ati: “Kuri iki Cyumweru, itariki ya 28 Kamena 2026, ahagana mu ma saa 1h00 ‘, ihuriro ry’ingabo z’ubutegetsi bwa Kinshasa zatwitse amazu menshi y’abasivili i Lumbishi nyuma yo kwishora mu busahuzi bwakozwe mu buryo bwateguwe.”
Yongeyeho ko “Imiryango yose yatikiriye mu muriro muri iki gitero cyakoranwe ubugome burengeje urugero”.
AFC/M23 yongeye gushimangira icyemezo cyayo cyo kurengera no kurinda abaturage b’abasivili igitero icyo ari cyo cyose, mu gihe ihamagarira abaturage ba Congo, Umuryango Mpuzamahanga, n’abunzi mu masezerano y’amahoro gutanga ubuhamya ku byaha by’intambara n’ibyaha byibasira inyoko muntu bikomeje gukorwa n’ubutegetsi bwa Kinshasa.
