Ivumburwa ry’umurambo w’umugabo wasanaga amagare wapfuye, wabonetse ahambiriye ku musaraba nyuma yo kwicwa mu buryo bw’urugomo rwinshi, ryatangaje cyane abaturage ba Kayogoro, muri Komini ya Makamba mu Ntara ya Burunga, mu majyepfo y’u Burundi.
Iki kibazo giheruka cyongeye gutera impungenge ku bwiyongere bw’ubwicanyi bwagaragaye muri aka gace k’igihugu mu mezi ashize nk’uko bitangazwa na SOS Medias Burundi dukesha iyi nkuru.
Nk’uko amakuru aturuka muri ako gace abivuga, Jared Kabura, umugabo wasanaga amagare yapfuye wari uzwi cyane n’abaturage bo muri ako gace, yasanzwe yapfuye mu gitondo cyo kuwa Kabiri mu Mudugudu wa Mushasha muri Zone Kayogoro.
Amakuru y’ibanze avuga ko yaba yaricishijwe ibuye yahondaguwe mu maso mbere y’uko umurambo we uboneka uhambiriye ku musaraba, ibintu byababaje cyane abaturage bo muri ako gace.
Jared Kabura, ukomoka mu Mudugudu wa Kigaza muri Zone ya Dunga, yasobanuwe n’abayobozi b’akarere n’abaturage nk’umuntu wiyubaha, ushimirwa akazi ke kandi utari ufitanye ibibazo n’abandi baturage.
Abayobozi batangiye iperereza, kandi abantu babiri bamaze gutabwa muri yombi kubera iki kibazo. Raporo zituruka aho hantu zigaragaza ko umwe mu bakekwaho icyaha arwaye indwara zo mu mutwe.
Ariko, abaturage barasaba ko hakorwa iperereza ryimbitse kugira ngo hamenyekane neza impamvu nyazo z’ubwicanyi, hamenyekane abashobora kuba barakoze ubwo bwicanyi n’ababuri inyuma.
