Umutwe wa Twirwaneho urwana ufatanya urugamba na AFC/M23 watangaje, ko watsindiye mu mirwano ihuriro rigizwe n’Ingabo za Repubulika Iharanira Demokarasi ya Kongo (FARDC), iz’u Burundi (FDNB) n’abarwanyi ba Wazalendo, bikarangira rikwiye imishwaro.
Twirwaneho yemeje ayo makuru biciye muri Colonel Rugabo Fidèle, mu butumwa yanyujije ku rubuga rwe rwa X.
Yavuze ko ririya huriro ry’ingabo za Leta ryatsindiwe mu mirwano yabereye mu duce twa Kimete na Kabanja, uduce twombi duherereye muri Teritwari ya Fizi, mu Ntara ya Kivu y’Amajyepfo.
Colonel Rugabo yavuze ko ingabo za FARDC n’iz’u Burundi nyuma yo gutsindwa zahise zitatana, zihungira mu duce twa Kitumba na Milimba, mbere yo guteguza ifatwa ry’aka gace ka nyuma n’aka Musi.
Yagize ati: “FARDC, FDNB na Wazalendo bakwiriye imishwaro. Kimete na Kabanja byafashwe. Bari kwiruka berekeza i Kitumba na Milimba. Muraho Musi na Lulimba! Harakabaho MRDP/M23.”
Iyi ntsinzi nshya ya Twirwaneho na AFC/M23 ije mu gihe imirwano ikomeje kuvugwa mu bice bya Minembwe na Fizi, aho iyi mitwe ikomeje kwigarurira ibice bitandukanye.
Ni ibice birimo Ruhinamavi, Bidegu, Kalingi, Gakenke, Mikenke, Bilalomboli, Ilundu, Kwa Mulima, Point-Zéro, Gipupu, Kiseke n’ahandi henshi.
