Umugabo w’Umwongereza yatawe muri yombi akekwaho kuneka ibirindiro bya gisirikare by’u Bwongereza biherereye muri Cyprus (Chypre) mu izina ry’igisirikare cya Iran.
Rashad Sultanov w’imyaka 44, wo muri Islington, mu majyaruguru ya London, arashinjwa gukora “igenzura rikomeye” ku birindiro bya gisirikare bya RAF (Royal Air Force) ahitwa Akrotiri no guha amakuru Igisirikare cya Iran nk’uko BBC ivuga.
Sultanov, ufite n’ubwenegihugu bwa Azerbaijan, yatawe muri yombi na polisi ya Chypre ku itariki ya 17 Nyakanga kandi ari mu maboko y’urukiko ategereje koherezwa mu Bwongereza.
Urwego rw’Ubushinjacyaha rwavuze ko azaburanishwa hakurikijwe Itegeko ry’Umutekano w’Igihugu, ikaba ari inshuro ya mbere icyaha giteganywa n’itegeko ryo mu 2023 gikozweho iperereza mu gihugu cy’amahanga.
U Bwongereza bwakomeje kugira ibirindiro bihoraho muri Akrotiri kuva mu myaka ya 1950 kandi ibikorwa bya RAF byo kurasa ibisasu bya misile na drones bya Iran bikorerwa aho kuva mu mezi ashize.
