Igitero kitiriwe inyeshyamba za Mai-Mai ku nkambi ya gisirikare ahitwa Kyubo Mamba, mu gace ka Mitwaba (Haut-Katanga), mu gitondo cyo ku Cyumweru, itariki ya 2 Kanama, cyahitanye abantu umunani, nk’uko imibare y’agateganyo yashyizwe ahagaragara na sosiyete sivile yo muri ako gace ibigaragaza.
Abaguye muri icyo gitero barimo abasirikare babiri n’abo mu miryango yabo batandatu. Inkongi y’umuriro yadutse muri icyo gitero yahitanye umugore w’umusirikare n’abana batanu.
Abasirikare babiri bakomerekejwe n’amasasu bakuwe aho bajyanwa kuvurwa, mu gihe abagore bane bahiye bikomeye. Ingo nyinshi zegereye aho nazo zangiritse nk’uko inkuru dukesha mediacongo.net ivuga.
Nyuma yo kugaba igitero, inyeshyamba zahise zisubira inyuma. Ubufasha bwa FARDC bwoherejwe buturutse muri centre ya Mitwaba kugira ngo barinde ako gace kandi batangire ibikorwa byo gukurikirana abagabye igitero.
Nubwo ituze ryagarutse, biravugwa ko abaturage bagifite ubwoba. Nta tangazo ryashyizwe ahagaragara na FARDC cyangwa abayobozi b’intara ryemeza iki gitero, imibare y’abakiguyemo ikiri iy’agateganyo.
