Umuryango w’Abibumbye wita ku Buzima (OMS) uravuga ko icyorezo cya Ebola gikomeje kwica abantu muri Repubulika Iharanira Demokarasi ya Congo (RDC) gishobora kuba cyakumirwa mu gihe cy’amezi atatu ari imbere, ariko abahanga bavuga ko hakiri imbogamizi zikomeye.
Kugeza ubu, Ebola imaze guhitana nibura abantu 2,325 muri iki cyorezo, cyageze mu ntara ya gatandatu ya RDC. Ni cyo cyorezo cya Ebola cya kabiri cyahitanye abantu benshi mu mateka y’iki gihugu.
Thierno Balde, ushinzwe guhuza ibikorwa bya OMS byo kurwanya Ebola, yavuze ko mu gihe haboneka ubushobozi bukenewe, iki cyorezo gishobora kugenzurwa mu mezi atatu ari imbere.
OMS ivuga ko imaze kubona hafi 60% by’amadolari miliyoni 115 zikeneye mu bikorwa byo kurwanya Ebola.
Gusa, ikibazo kiracyakomeye. Hagati ya 70% na 80% by’abandura bashya nta sano izwi bafitanye n’abandi barwayi, ibintu bigaragaza ko virusi ikomeje gukwirakwira ahantu hatandukanye.
Abandi bayobozi b’ubuzima bavuga ko RDC ikiri kure yo kugenzura Ebola, kubera gutinda gutahura abanduye, umutekano muke uterwa n’intambara, ubushobozi buke bw’amakipe akurikirana indwara ndetse no kubura inkingo n’imiti bihagije ku bwoko bwa Ebola bwitwa Bundibugyo.
Nubwo bimeze bityo, ibikorwa byo guhangana n’icyorezo birimo kongerwa imbaraga. Mu byumweru bibiri bishize hiyongereyeho ibiryamirwa 400, ndetse hateganyijwe koherezwa abandi bahanga mu gukurikirana no kumenya abantu bashobora kuba barahuye n’abanduye.
OMS irashimangira ko amezi atatu ari igihe gishoboka cyo kugenzura icyorezo, ariko ko intsinzi izaterwa n’ubushobozi bwo kubona amafaranga, abakozi, ibikoresho n’ubufatanye bukenewe.
Ku rundi ruhande, Africa CDC ivuga ko hakiri byinshi bitaramenyekana ku rugero nyarwo rw’ikwirakwira rya Ebola muri RDC.
