Imirwano ikomeye yaramukiye muri Segiteri ya Gatoyi, muri Teritwari ya Masisi mu Ntara ya Kivu y’Amajyaruguru, yasize abarwanyi b’umutwe wa AFC/M23 bigaruriye uduce dutandukanye twaho.
AFC/M23 yigaruriye kariya gace nyuma yo kuhirukana ihuriro ry’ingabo zirwana ku ruhande rwa Leta ya Congo ziganjemo abarwanyi b’imitwe ya Wazalendo.
Amakuru aturuka muri ako gace avuga ko imirwano yatangiye mu rukerera rwo kuri uyu wa Kabiri tariki ya 25 Kanama 2026, ubwo abarwanyi ba M23/AFC batangizaga ibitero ku birindiro bitandukanye bya Wazalendo.
Imirwano kandi yabeeeye mu bice birimo Muhayirwa, Bukumbirwa na Nkokwe na Mulema, aho amakuru avuga ko hakoreshejwe imbunda ziremereye ndetse n’indege nto zitagira abapilote zikora ibitero.
Abaturage bo muri ibi bice, nk’uko ayo makuru akomeza abivuga, batangiye guhunga ingo zabo kubera ubukana bw’imirwano, bamwe berekeza mu bice bibona ko birimo umutekano kurushaho.
Gatoyi ni agace kari muri Teritwari ya Masisi, kamwe mu duce two muri Kivu y’Amajyaruguru tumaze igihe tugaragaramo imirwano hagati ya M23/AFC n’imitwe ihuriza hamwe abarwanyi ba Wazalendo, bafatanya n’ingabo za Repubulika Iharanira Demokarasi ya Congo (FARDC).
