Imitwe irindwi yitwaje intwaro muri Ethiopia yatangaje ko yashinze ihuriro rigamije gukuraho guverinoma ya Minisitiri w’Intebe Abiy Ahmed. Ihuriro ryiyise “Alliance for Survival”.
Imitwe ivuga ko ubuyobozi bwa Abiy Ahmed bwatakaje uburenganzira bwo kuyobora kandi ko nta bushake bwo kuganira n’imitwe yitwaje intwaro bufite.
Iri tangazo rikurikira inkuru zimaze amezi abiri zigaragaza ko abatavuga rumwe n’ubutegetsi n’imitwe yitwaje intwaro bari kwitegura gushinga ihuriro rigari.
Imitwe ivuga ko ifite umugambi wo kurwanya guverinoma ya Addis Ababa no gushishikariza gushyiraho ubuyobozi bw’inzibacyuho. Iraburira ko Ethiopia ishobora gucikamo ibice mu gihe ibibazo by’igihugu bitakemurwa.
Guverinoma ntabwo iragira icyo ivuga ku itangazo ryasohowe n’iyi mitwe nk’uko inkuru dukesha BBC ivuga.
Ethiopia imaze imyaka myinshi igaragaramo amakimbirane mu turere twa Oromia na Amhara. Umwuka mubi kandi ukomeje kwiyongera muri Tigray, mu majyaruguru y’igihugu.
Nk’uko impuguke zibivuga, intambara y’imyaka ibiri n’inyeshyamba zo muri Tigray yahitanye abantu ibihumbi amagana.
Abayobozi b’akarere bashinja guverinoma kuba yarananiwe gushyira mu bikorwa amasezerano y’amahoro yo mu 2022 yarangije iyo ntambara.
