Mu rubanza ruregamo umunyamakuru Phocas Nadayizera na bagenzi be 13, ubushinjacyaha bwabasabiiye gufungwa burundu kuko ngo ibyaha baregwa ari indengakamere.
Kuri uyu wa Gatanu tariki 18 Nzeri 2020 I Nyanza mu Majyepfo y’u Rwanda nibwo Phocas Ndayizera na bagenzi be uko ari 13 baregwa ibyaha byo gucura umugambi mu gukora iterabwoba bakoresheje ibintu biturika, ku bikorwa remezo binyuranye mu mujyi wa Kigali bongeye kugaragara mu rukiko. Uyu munsi harihatahiwe kumva icyo ubushinjacyaha buvuga ku bwiregure bwa Phocas Ndayizera na bagenzi be bwabaye mu maburanisha yabanje.
Ubushinjacyaha bwagarutse ku majwi buvuga ko yafashwe bamwe mu baregwa, nka kimwe mu bimenyetso simusiga buvuga ko gihamya umugambi bari bafite wo guhungabanya umutekano.
Ayo majwi yumvikanamo Cassien Ntamuhanga wacitse gereza mu 2017 , ufatwa nk’uwateguraga uwo mugambi, avugana na Nsengimana Jean Claude wahimbwaga Tembo, uri mu baregwa .
Muri aya majwi, Ntamuhanga yumvikana asaba Tembo kumushakira intambi zikunze gukoreshwa n’abakora ubucukuzi bw’amabuye y’agaciro.
Urukiko rwabajije igihamya ko ayo majwi ari aya Ntamuhanga.
Abashinjacyaha bavuga ko hari abahamya ko yafashwe bahari, kandi hashobora gukoreshwa ikoranabuhanga mu gutahura ijwi ry’umuntu.
Ubushinjacyaha kandi bwahakanye ibyavuzwe na Phocas Ndayizera ko yahatiwe ndetse agapfukwa igitambaro mu maso kugira ngo asinye inyandiko yemera ibyaha, buvuga ko ibyo mu Rwanda bidashoboka.
Abashinjacyaha basabiye abaregwa bose uko ari 13 gufungwa burundu.
Abunganira abaregwa basabye umwanya wo kuvugana n’abo bunganira ku gihano basabiwe n’abashinjacyaha barawimmwa,gusa babizeza ko bazawuhabwa mu iburinisha rya nyuma riteganijwe kuwa 14,na 15 Ukwakira 2020 ari nabwo uru rubanza ruzashyirwaho akadomo.
