Ihuriro ry’Imitwe ya Politiki n’amashyaka yemewe mu gihugu rimaze gutora abasenateri basimbura abo ryatanze barangije manda.
Abamaze gutorwa ni Mukakarangwa Clotilde wo mu ishyaka riharanira Demokarasi ihuza abaturage, Parti Democrate Centriste (PDC) na Mugisha Alexis wo mu ishyaka riharanira Demokarasi n’ibidukikije, Democratic Green Party. Aba batorewe gusimbura Senateri Mukakarisa Jeanne d’Arc na Uyisenga Charles biteganijwe ko barangiza manda yabo mu Kwakira 2020.
Abatorewe mu ihuriro y’amashyaka ya politiki yemewe mu Rwanda bazategereza kwemezwa n’Urukiko rw’Ikirenga nk’uko Itegekonshinga rya Repubulika y’u Rwanda ribiteganya.
Urukiko rw’Ikirenga nirumara kubemeza, bazahita batangira inshingano mu nteko ishingamategeko y’u Rwanda.
Abasenateri batorwa n’imitwe ya politiki yemewe ni bamwe mu basenateri badatorwa n’abaturage, aba biyongera ku bashirwaho n’umukuru w’gihugu n’abatorwa mu matora rusange y’abaturage.
Manda ya 3 ya Sena yatangiye ku itariki ya 17 z’ukwezi kwa 10 mu mwaka ushize wa 2019. Icyo gihe abasenateri barahiye bari 20, barimo 4 bashyirwaho na Perezida wa Repubulika, 2 batorwa n’Ihuriro ry’Igihugu Nyunguranabitekerezo ry’imitwe ya politiki, 2 batorwa muri kaminuza n’amashuri makuru na 12 batorwa hashingiwe ku nzego z’imitegekere y’igihugu.
Abasenateri 6 bagiye gusoza manda ni 6 , harimo 4 bashyizweho na Perezida wa Repubulika ari bo Senateri Karangwa Chrysologue, Senateri Karimba Zephilin, Senateri Uwimana Consolée na Senateri Nyagahura Marguerite mu gihe abandi 2 ari bo Senateri Uyisenga Charles na Senateri Mukakarisa Jeanne D’Arc bashyizweho n’Ihuriro ry’Igihugu Nyunguranabitekerezo ry’imitwe ya politiki.
