Destiny Hope Cyrus uzwi nka Miley Cyrus yavutse ku itariki 23 Ugushyingo 1992, avukira i Franklin, muri Tennesse, kuri Leticia “Tish” Jean Finley n’umuririmbyi w’injyana ya Country Music, Billy Ray Cyrus. Ababyeyi be bashyingiranye nyuma y’umwaka umwe avutse. Cyrus yavukanye indwara ya tachycardia idasanzwe, indwara itera gutera kudasanzwe k’umutima nk’uko tubikesha amavomo atandukanye nka Wikipedia, biography.com, time.com n’andi.
Izina yavukanye, Destiny Hope, ryagaragaje ko ababyeyi be bizeraga ko azakora ibintu bikomeye. Ababyeyi be bamuhaye akabyiniriro ka “Smiley”, nyuma baza kugahindura “Miley”, kubera ko yakundaga kumwenyura akiri uruhinja. Mu 2008, yahinduye izina mu buryo bwemewe n’amategeko yitwa Miley Ray Cyrus; izina rye ryo hagati riha icyubahiro sekuru, umunyapolitiki w’umudemokarate, Ronald Ray Cyrus ukomoka muri Kentucky. Ni mu gihe yabyawe muri batisimu n’umuririmbyi w’icyamamare Dolly Parton wanagize uruhare runini mu rugendo rwe rwa muzika.
Cyrus n’umuryango we
Birengagije inama bagirwaga n’ikigo gitunganya indirimbo ise yakoranaga nacyo, Ababyeyi ba Cyrus bashyingiranywe rwihishwa ku ya 28 Ukuboza 1993, amaze umwaka avutse. Babyaranye abandi bana babiri, umuhungu Braison n’umukobwa witwa Noah. Kuva mu mibanire yabanje, nyina yabyaye abandi bana babiri, Brandi na Trace. Ni mu gihe umuhungu wa mbere wa se, Christopher Cody, yavutse muri Mata 1992 arerwa na nyina Kristin Luckey, muri Caroline y’Amajyepfo.
Abavandimwe ba Cyrus bose bakora mu myidagaduro. Trace ni umuririmbyi n’umucuranzi wa gitari wo mu itsinda Metro Station. Noah ni umukinnyi wa filime, kandi we na Braison, ni abanyamideli, abaririmbyi, n’abanditsi b’indirimbo.
Brandi yahoze ari umucuranzi w’itsinda rikora injyana ya indie rock ryitwa Frank + Derol ndetse akaba DJ wabigize umwuga.Umuryango wa Cyrus ukaba ufite igikingi kingana na hegitari 500 hanze y’Umujyi wa Nashville, muri Tennesse.
Cyrus yize mu ishuri ribanza rya Heritage mu Ntara ya Williamson, igihe umuryango we wabaga muri Tennesse. Igihe yatoranywaga kuzakina muri Hannah Montana, umuryango wimukiye i Los Angeles, aho yahawe amasomo atandukanye ku gukina filimi ndetse akigishwa n’abarimu bigenga kuri iyi filimi ya mbere yendaga kugaragaramo.
Yakuriye mu muryango wa gikristo, abatirizwa mu rusengero rw’Ababatisita rwo mu majyepfo mbere yo kwimukira i Hollywood mu 2005. Yakundaga kujya mu rusengero buri gihe arimo gukura. Mu 2001, igihe Cyrus yari afite imyaka umunani, we n’umuryango we bimukiye i Toronto muri Canada, ubwo se yari arimo gufata amashusho ya filimi y’uruhererekane yiswe “Doc”.
Nyuma, Billy Ray Cyrus yajyanye umukobwa we Miley Cyrus mu nzu ya sinema yitwa Royal Alexandra, kureba filimi yitwa “Mamma Mia” yakozwe na Mirvish mu 2001, maze Cyrus afata se ukuboko aramubwira ati: “Iki ni cyo nshaka gukora, papa. Ndashaka kuba umukinnyi wa filime.”
Cyrus na se Billy Ray Cyrus
Ntibyatinze, mu 2003 Cyrus yagaragaye bwa mberemuri filimi yakorwaga na se, “Doc” akina umukobwa witwa Kylie. Yahawe amashimwe kandi muri filimi Big Fish ya Tim Burton, akina yitwa ‘Ruthie’. Kuva ubwo yagerageje gukina mu zindi nka Sharkboy and Lavagirl, nubwo yari umwe muri ba babiri bageze kuri finale mu majonjora y’abazayikinamo, yahisemo kugaragara muri filimi yiswe “Hannah Montana” yatumye aba icyamamare ku Isi yose akiri muto.
Nyina yafashe inshingano zo kuba ‘manager’ wa Miley maze akora aharanira gushaka ikipe izafasha umukobwa we kubaka umwuga we. Cyrus yasinyanye na Mitchell Gossett, umuyobozi w’ishami ry’urubyiruko muri Cunningham Escott Slevin Doherty. Gossett akunze gushimirwa “kuvumbura” Cyrus kandi yagize uruhare runini mu gutuma atoranywa mu gukina muri Hannah Montana.
Nyuma yaje gusinyana na Jason Morey wo mu itsinda rya Morey Management Group ngo rizite no ku mwuga we wa muzika, amuyoboweho na nyina wa batisimu Dolly Parton.
Cyrus na Dolly Patton
Cyrus yakoreshejwe ikizamini cyo kuzakina muri filimi y’uruhererekane, “Hannah Montana” ya Televiziyo ya Disney Channel afite imyaka cumi n’umwe. Yagombaga gukina ari inshuti magara y’umukinnyi w’imena, ariko birangira ari we uhawe kuzakina iyi role y’umukinnyi w’imena. N’ubwo yabanje kwangirwa kubera ko yari muto, yaje gutorwa nk’umukinnyi w’imena kubera ubushobozi yari afite bwo kuririmba no gukina.
Iyi filimi yerekanwe bwa mbere muri Werurwe 2006 imbere y’imbaga yakurikiranaga Disney Channel, bidatinze iza mu myanya ya mbere muri filimi zari zikunzwe icyo gihe. Gukundwa kw’iyi filimi kwatumye Cyrus akundwa cyane n’abana b’ingimbi ndetse ahabwa n’igihembo cya “Teen Choice Award ”.
Muri Nzeri 2006 yazengurukanye n’abakobwa bo mu itsinda rya The Cheetah Girls nka Hannah Montana, akora indirimbo zumvikana muri season ya mbere y’iyi filimi. Walt Disney Records yasohoye indirimbo yitiriwe imico ya Hannah Montana muri iyi filimi mu Kwakira uwo mwaka.
Iyi ndirimbo yarakunzwe cyane iragurishwa bikomeye ku buryo yaje ku isonga rya Billboard 200 muri Amerika; hagurishwa kopi zirenga miliyoni eshatu ku isi. Hamwe no gusohora soundtrack (indirimbo zumvikana muri filimi) Cyrus yabaye umukinnyi wa mbere wakoranye na Walt Disney wagiranye amasezerano ajyanye na filimi z’uruhererekane, filimi, zirangira, kwamamaza n’umuziki.
Miley Cyrus kandi yagaragaye mu zindi fimi zitandukanye nka The Last Song (2010), LOL (2012), So Undercover (2012), Miley: The Movement (2013), The Night Before (2015), A Very Murray Christmas (2015), Crisis in Six Scenes (2016), na Guardians of the Galaxy Vol. 2 (2017).
Alubumu n’indirimbo zakunzwe
Muri alubumu ze zakunzwe twavuga nka ‘Breakout,’ ‘The Time of Our Lives,’ ndetse na ‘Can’t Be Tamed”
Album ye ya kabiri yiswe, Breakout, yaramenyekanye cyane mu 2008, igera ku isonga rya alubumu za pop. Umwaka wakurikiyeho yasohoye “The Time of Our Lives’ iriho indirimbo zamamaye nka “Party in USA.” na ” When I Look at You,” iyo ya mbere yabaye imwe mu ndirimbo zahiriye uyu muhanzikazi kugeza n’ubu, aho imaze kugurisha kopi zirenga miliyoni 5.38 kandi ikabona umwanya mu ndirimbo zagurishijwe cyane z’ibihe byose. Uyu muhanzi wari ukiri muto yakurikiranye iyo ntsinzi asohora alubumu nshya mu 2010 yise “Can’t Be Tamed”.
Indirimbo nka ‘We Can’t Stop,’ ‘Wrecking Ball,’ ‘Bangerz’ ntizizibagirana
Cyrus yashatse kwitandukanya na Hannah Montana wari ukiri umwana muto, yogosha umusatsi asigarna mugufi atangira kwambara imyambaro atari azwiho, ariko nta muntu kubona aho yari yiteguye kugera.
Ubwo hatangwaga ibihembo bya MTV Video Music Music Awards (VMAs) muri Kanama 2013, Cyrus yatunguye abari aho. Asubiramo indirimbo ye ‘We Can’t Stop,’ aho yagiye ku rubyiniro asa nk’uwambaye ubusa neza no mu ndirimbo yakurikiye ‘Wrecking Ball,’.
Benshi batunguwe n’iyo myifatire y’umwana w’umukobwa wari ukiri muto, ariko bituma alubumu ye kane ““Bangerz”, yasohotse mu Kwakira 2013 igurishwa cyane.”
Hagati aho, indirimbo ye “Wrecking Ball” yabaye indirimbo ya mbere mu njyana ya pop muri Amerika ndetse imuhesha igihembo cya Video y’umwaka muri VMA 2014 .
Muri uyu mwaka wa 2014, ku myaka 22 y’amavuko, Miley Cyrus ni umwe mu bantu bato bagaragaye ku rutonde rw’ikinyamakuru Time rw’abantu 100 bavuga rikijyana ku Isi , rwariho abandi bahanzi nka Beyoncé, Carrie Underwood na Pharrell Williams.
Mu 2015 yasohoye indi alubumu yise “Miley Cyrus & Her Dead Petz” itarakunzwe cyane, aza gusohora indi yise “Younger Now” mu 2017 yari iriho indirimbo yitwa “Malibu” yagaragaje kugaruka kwe kwiza.
Alubumu ye ya karindwi yabanje gusohora icyiciro cya mbere kigizwe n’indirimbo 6 yitwa ‘She Is Coming’, zakurikiwe muri Gicurasi mu mwaka ushize wa 2019, n’indirimbo nka “Mother’s Daughter”, akurikizaho muri Kanama “Slide Away”, mbere yo gukorana na Ariana Grande na Lana Del Rey iyo bise “Don’t Call Me Angel,”.
Cyrus n’umukunzi we baheruka gutandukana Liam Hemsworth
Cyrus, kandi yavuzwe mu rukundo n’umuhanzi Nick Jonas wo mu Itsinda Jonas Brothers muri za 2007, akundana n’abandi nk’umunyamideli, Justin Gaston, umukinnyi wa filimi Carter Jenkins, kugeza muri Kamena 2012 aho nyuma y’imyaka utatu bari kumwe Cyrus yatangaje ko agiye kubana n’umukinnyi wa filimi Liam Hemsworth baje gutandukana muri 2013 bakaza kongera kwiyunga bagashyiranwa ku itariki 23 Ukuboza 2018 mbere yo kongera gutandukana mu mwaka ushize.
Mu gusoza twavuga ko uyu muhanzikazi kuri ubu ufite imyaka 28 mu gihe amaze mu myidagaduro amaze gutwara ibihembo bitandukanye byibuze bigera kuri 50.
