Mu gikorwa cy’umuganda usanzwe uba buri wa Gatandatu wa nyuma w’ukwezi, kuri uyu wa Gatandatu tariki 24 Nzeri 2016 Minisitiri w’intebe Dr. Anastase Murekezi yifatanyije n’abaturage bo mu murenge wa Mpamba mu karere ka Gisagara ho mu ntara y’amajyepfo mu gutangiza igihembwe cya mbere cy’ihinga cy’umuhindo.
Minisitiri Murekezi yagarutse ku babaye imbata y’ubusinzi bakirirwa banywa inzoga zishobora gushyira ubuzima bwabo mu kaga ari nako zibadindiza mu iterambere no kuba zigira uruhare runini mu guhungabanya umutekano.
Yagize ati, “Mboneyeho rero gusaba Abanyagisagara n’abandi Banyarwanda bakinywa bya biyoga byicana birimwo za nyirantare, muriture, ibikwangari na mukubitumwice, gutana nabyo burundu. Ibi biyoga bibagiraho ingaruka mbi nyinshi zirimo kubangiriza ubuzima, kubaca intege no kubangamira umutekano”.
ku bijyanye n’igihembwe cy’ihinga cy’Umuhindo, Minisitiri w’intebe yibukije abanyagisagara n’abanyarwanda muri rusange kwibanda ku bikorwa by’ubuhinzi bijyana no gufata amazi, kurwanya isuri mu mirima hacibwa amaterasi y’indinganire n’imiringoti biterwaho ibyatsi n’ibiti byabigenewe.
Mu rwego rwo guhangana n’ihindagurika ry’ibihe risigaye ribangamira ubuhinzi n’ubworozi, abahinzi bose bakanguriwe guhinga kare. Yagize ati, “Abataratera bafatira urugero kubarangije gutera tunashimira, maze nabo bazarangize gutera imbuto bitarenze itariki ya 15/10/2016. Ndabibutsa kandi kugira umuco wo kuhira imyaka mu gihe cyose imvura yaba nkeya. Ibi byorohera cyane cyane abafite imirima ahatunganijwe, cyangwa n’abandi bose bahinga hafi y’ibiyaga n’imigezi”.
Abakora ibikorwa by’ubuhinzi n’ubworozi bamazwe impungenge ku mbogamizi z’uburwayi bwabangiririzaga imyaka bukanabicira amatungo, bizezwa ko leta igiye gukora uko ishoboye ikabafasha guhangana nabyo ari nako bashakirwa imbuto zijyanye n’igihe.
Minisitiri Murekezi yagize ati, “Guverinoma y’uRwanda kandi irizeza Abahinzi-Borozi ko izakomeza kurwanya indwara n’ibyonyi bikunze guteza abaturage igihombo, no kubabonera imbuto nshya zitarwaye”.
Iki gikorwa cyari kitabiriwe n’abaturage b’umurenge wa Mpamba n’indi itandukanye igize akarere ka Gisagara, abayobozi batandukanye barimo Minisitiri w’ubuhinzi n’ubworozi, Dr Gerardine Mukeshimana; Guverineri w’intara y’Amajyepfo Munyentwari Alphonse n’abayobozi mu nzego zitandukanye z’akarere ka Gisagara.
Abayobozi n’abaturage bibukijwe ko bagomba kuvugurura imikorere no gukorera hamwe mu kwitwara neza mu mihigo inzego z’Ibanze, izo mu butegetsi bwite bwa Leta n’abikorera zasinyanye na Nyakubahwa Perezida wa Repubulika y’u Rwanda Paul Kagame kuwa 09 Nzeri 2016.
Kanda hano ujye ubona amakuru yihuse kandi kugihe kuri Facebook no kuri twitter
Théogène U @Bwiza.com
