Ikigo gishinzwe iby’ingendo zo mu kirere mu Bushinwa, gitangaza ko abakira abantu mu ndege bakwiriye kwambara pampa (ibikoreshwa mu kwibinda) kugira ngo batavaho bajya mu bwiherero igihe indege iri mu kirere hirindwa COVID-19. Iki kigo kivuga ko ibi byafasha mu guhangana n’iki cyorezo, abazajya bambara pampa ari abatanga serivisi mu ndege zijya mu bihugu birimo COVID-19. Aba kandi bahawe amabwiriza ko bagomba kwambara inkweto n’ingofero bikoreshwa rimwe gusa. Abo bireba bamaganaye iki cyemezo bavuga ko ari nko kubagira nk’abana kuko ari bo bakwiriye kwambara pampa. Uyu mwanzuro ufashwe nyuma y’aho umugenzi umwe yanduye Coronavirus ubwo yagiye mu bwiherero bw’indege yavaga mu Butaliyani ijya muri Koreya y’Epfo.
