Igisirikare cya Repubulika Iharanira Demokarasi ya Congo (FARDC) cyatangaje ko cyishe abarwanyi 14 bo mu mutwe wa ADF ukomoka muri Uganda, nyuma y’imirwano yasakiranyije impande zombi muri Beni ho mu ntara ya Kivu y’Amajyaruguru.
Ni amakuru yemejwe na Gen Peter Cirimwami, Umuvugizi wa Operasiyo Sokola 1 igizwe n’ingabo za RDC ziri mu bikorwa byo guhiga imitwe yitwaje intwaro muri kariya gace; wavuze ko ingabo zanafashe ibikoresho bya gisirikare byinshi.
Ni nyuma y’imirwano ikomeye yatangiye ku wa Gatanu w’icyumweru gishize.
Gen Cirimwami yagize ati: “Turi mu nzira zo gushakisha ibirindiro bya ADF muri Semuliki. Twishe abarwanyi 14 ba ADF tunafata intwaro nyinshi. Tuzakomeza kubahiga kugeza ku munota wa nyuma.”
Ingabo za Congo/Kinshasa zigambye kwica abarwanyi ba ADF, mu gihe mu cyumweru gishize waherukaga kugaba igitero gikomeye mu gace ka Nzenga muri Kivu y’Amajyaruguru, kigwamo abaturage 12 mu gihe ababarirwa muri 20 baburiwe irengero.
