Ingabo za RDC kuri uyu wa 2 Mutarama 2021 zatangaje ko zishe abarwanyi 14 b’umutwe witwaje intwaro wa ADF barimo Abarabu babiri.
Ni mu mirwano yabereye mu gace ka Loselose muri Teritwari ya Beni mu Ntara ya Kivu y’Amajyaruguru, tariki ya 1 Mutarama 2021 nk’uko byemejwe n’Umuvugizi wa Operasiyo Sokola 1 igamije guhashya inyeshyamba, Lt. Anthony Mualushayi.
Lt. Mualushayi mu nkuru ya 7sur7 yagize ati: “Ingabo zacu zo muri Regima 3202 zagabye igitero ku barwanyi ba ADF mu giturage cya Loselose tariki ya 1 Mutarama. Abarwanyi 14 ba ADF barimo Abarabu Bera babiri bahasize ubuzima, zimwe mu ntwaro zirafatwa.”
Muri iyi mirwano kandi, n’ingabo za RDC ebyiri zahasize ubuzima, izindi 7 zarakomeretse.
Agace ka Loselose kari karafashwe n’abarwanyi ba ADF mu gihe kingana n’iminsi itatu nk’uko byemezwa n’igisirikare cya RDC, ingabo z’iki gihugu zikabohoza habanje imirwano ikaze, aho zafashijwe n’ingabo ziri mu butumwa bw’amahoro (MONUSCO).
