Mu Rukiko Rukuru rwa Gisirikare rwa Makindye muri Uganda, kuri uyu wa Gatanu, abayoboke 48 b’ishyaka National Unity Platform, rya Bobi Wine, barimo umuhanzi Nubian Li, bashinjwe gutunga amasasu ane y’imbunda.
Uru rukiko rwa gisirikare rwabwiwe n’ubushinjacyaha ko ku itariki 03 Mutarama 2021, ahitwa Makerere Kavule, muri Zone ya Kigundu, abashunjwa basanganwe amasasu ane ya AK-47 bari bafite mu buryo butemewe n’amategeko, buvuga ko nta wundi muntu wemerewe kuba afite amasasu atari umusirikare cyangwa ushinzwe umutekano.
Mu bakekwa harimo, Edward Ssebufu uzwi nka Eddy Mutwe, akaba bodyguard wa Bobi Wine, wiyamamariza kuba perezida, umuhanzi, Ali Buken uzwi nka Nubian Li, n’umunyamakuru William Ntege uzwi nka Kyma kya Yesu.
Leta ivuga ko nubwo abashinjwa bose ari abasivili, barebwa n’amategeko ya gisirikare hashingiwe ku ngingo ya 119 y’itegeko rigenga UPDF ryo mu 2005.
Iyi nkuru dukesha Chimpreports ivuga ko abakekwa bakomeje gufungwa kuzageza ku itariki 19 Mutarama ubwo urubanza rwabo ruzasubukurwa. Ibi bikaba bisobanuye ko aba batazitabira amatora yo mu cyumweru gitaha y’umukuru w’igihugu n’abadepite.
Abashinjwa uko ari 48 ni bamwe mu bayoboke 106 ba NUP bafatiwe ahitwa Kalangala mu mpera z’ukwezi gushize bashinjwa mu Rukiko rwa Masaka gushishikariza ubugizi bwa nabi no gukora igikorwa gishobora kurushaho gukwirakwiza icyorezo cya Covid-19.
Mu gihe abandi barekuwe batanze ingwate, aba bakomeje gufungwa, ariko kuri uyu wa Gatanu bakuwe muri Maska boherezwa gufungirwa mu Kigo cya Gisirikare cya Makindye.
