Igisirikare cya Ethiopia kuri iki Cyumweru cyatangaje ko kivuganye abantu 15 b’ishyaka TPLF ryahoze riyoboye mu Ntara ya Tigray ndetse kigafata abandi umunani nk’uko byatangajwe kuri televiziyo ya leta.
Iyi televiziyo yitwa Ethiopian Broadcasting Corporation ivuga ko umusirikare mukuru w’iki gihugu w’ipeti rya Brig. General yavuze ko mu bafashwe harimo n’uwahoze ari perezida w’iyi ntara Abay Weldu, wari na chairman w’ishyaka ryari ku butegetsi hano. Mu bishwe kandi harimo uwahoze yungirije umukuru w’igipolisi.
Minisitiri w’Intebe wa Ethiopia, Abiy Ahmed na guverinoma ye batangaje intsinzi mu makimbirane yayo n’ishyaka TPLF ryari riyoboye Intara ya Tigray kuwa 28 Ugushyingo nyuma y’igihe kikabakaba ukwezi cy’imirwano.
Abayobozi ba TPLF bahunze biyemeje gukomereza urugamba mu misozi, ariko Ibiro Ntaramakuru by’Abongereza, Reuters, dukesha iyi nkuru bivuga ko bimaze ibyumweru bitarabasha kuvugana nabo.
Itangazo ryashyizwe ahagaragara ry’abishwe n’abafashwe ryaje nyuma y’aho kuwa Gatanu igisirikare cyari cyatangaje ko cyafashe Sebhat Nega, washinze TPLF. Kuwa Gatandatu, uyu akaba yarajyanywe I Addis Abeba mu murwa mukuru.
Abay wahoze ari Perezida wa TPLF wafashwe, yabaye Perezida wa Tigray kuva mu 2010 kugeza mu 2018, asimburwa n’umuyobozi w’iri shyaka kuri ubu, Debretsion Gebremichael. Abay yari chairman w’ishyaka kuva mu 2012 kugeza mu 2017 nabwo asimburwa na Debretsion kuri uwo mwanya.
Uwahoze ari visi perezida w’iyi ntara kandi, Abraham Tekeste nawe yarafashwe nk’uko byemezwa na televiziyo ya leta. Uyu akaba yaranabaye minisitiri w’imari muri guverinoma nkuru ya Ethiopia kuva mu 2016 kugeza mu 2018.
Hagati aho, aho Debretsion, n’abandi bagize komite nkuru y’ishyaka ndetse n’abahoze ari abasirikare bakuru baherereye ntiharamenyekana.
