Kuri uyu wa Gatatu, itariki 13 Mutarama 2021, ahagana saa sita z’amanywa, abasirikare ba Cote d’ivoire bari mu butumwa bw’Umuryango w’Abibumbye bwo kubungabunga amahoro muri Mali (Minusma) bagabweho igitero cy’iterabwoba bari mu butumwa bw’ubutasi mu birometero 95 ugana mu majyepfo ya Tombouctou abagera kuri batatu bahasiga ubuzima nk’uko byatangajwe n’umugaba mukuru w’ingabo za Cote d’Ivoire, mu itangazo ryashyizwe aharagara mu ijoro ryakeye.
Itangazo ry’Umuryango w’Abibumbye ryo rivuga ko kompanyi ya Minusma yari mu gikorwa gifitanye isano n’umutekano yasakiranye n’ibiturika bitunguranye mbere yo kuraswaho urufaya rw’amasasu n’abantu bitwaje intwaro batamenyekanye.
Ibi byabereye mu majyaruguru ya Bambara-Maoude, ku muhanda uhuza Douentza na Tombouctou, mu karere gakunze kurangwamo ibikorwa by’ubugizi bwa nabi.
Ingabo z’umuryango w’Abibumbye zagerageje kwirwanaho abateye basubira inyuma barahunga, ariko itangazo rya Minusma rivuga ko abasirikare batatu bayo (bakomoka muri Cote d’Ivoire) bishwe, abandi batandatu bagakomereka nk’uko iyi nkuru dukesha AFP ivuga.
Kuva mu 2013 yagera muri Mali, Minusma imaze gupfusha abasirikare bagera kuri 230, abagera ku 130 bakaba bariciwe mu mirwano ikaze nk’uko imibare ya Loni ibigaragaza. Ubu nibwo butumwa bwa mbere bumaze kwicirwamo ingabo nyinshi za Loni ku Isi.
Minusma igizwe n’abantu 15,000, barimo abasirikare 12,000, ikunze kwibasirwa n’ibitero bihoraho byibasira uruhererekane rw’imodoka zayo cyangwa ibirindiro by’ingabo zayo. Inyinshi muri izi mfu zatewe n’ibisasu bya mine biba byatezwe imodoka zayo.
Hagati y’Ukuboza n’intangiriro za Mutarama, abasirikare batanu b’u Bufaransa boherejwe muri Operation Barkhane nabo bamaze kwicirwa muri Mali bahitanwe na za mine. Ibi bikorwa bikaba byigambwa n’umutwe wa Kisilamu witwa GSIM (Groupe de soutien à l’islam et aux musulmans) ukorana na Al-Qaida.
