Perezida w’u Burundi aremeza ko udupfukamunwa twarushijeho kongera Covid-19

Perezida w’u Burundi, Evariste Ndayishimiye yatangaje ko kwambara udupfukamunwa ari kimwe mu bintu byarushijeho kuzamura ubwandu bwa Covid-19 mu Burundi.

Umukuru w’igihugu cy’u Burundi avuga ko mu kurwana n’umwanzi abantu bakwiye kugendera ku itegeko rimwe kuko buri wese iyo agendeye kubye ntacyo bageraho.

Avuga ko abantu bagomba kubanza kumenya umwanzi bahanganye, kuberako yavugaga ibijyanye na Covid-19 asobanura ko bagomba kumenya uko indwara imeze hagafatwa n’ingamba zo kuyirwanya.

Nk’uko byakwirakwijwe kuri Twitter, Perezida Ndayishimiye yumvikana mu mashusho akomeza asobanura ko kwambara udupfukamunwa mu kwirinda ikwirakwira rya Covid-19 ahubwo kwatumye irushaho kwiyongera.

Ati: “Abantu benshi bambaye mask (udupfukamunwa), burya handuye abantu benshi. Kubera iki? Wahise ugirango ntacyo yikanga, njyewe nikingiye mfite agapfukamunwa. Agahita agenda agakora aho ufite corona yakoze. Yagirango anywe amazi agahita akuraho agapfukamunwa agahita asubizaho.”

Kanda hasi hano nawe wumve

Perezida Ndayishimiye yongeyeho ko ibi byatumye inshuro umuntu yakoraga ku munwa ziyongera kurusha uko byari bisanzwe.

Bamwe mu bakoresha twitter bumvise ibi babaye nk’abamusubiza bavuga ko Abarundi bashobora kuba barumvise ko ntacyo baba mu gihe bambaye udupfukamunwa ariko bakibagirwa izindi ngamba z’isuku nko gukaraba intoki kenshi.