Umunya-Uruguay, Luis Suarez, yongeye gutaramirwaho nyuma yo gufatwa amashusho anosha myugariro Antonio Rudiger wa Chelsea.
Suarez na Atletico Madrid akinira bari bakiriye Chelsea ku kibuga Wanda Metropolitano, mu mukino ubanza wa 1/8 cya UEFA Champions league.
Ni umukino Chelsea yatsinzemo igitego 1-0 cyatsinzwe na Olivier Giroud.
Ni Chelsea yarushaga cyane Atletico Madrid yarangije umukino nta shoti na rimwe rigana mu izamu iteye.
Muri uyu mukino rutahizamu Luis Suarez yafashwe amashusho anosha akaguru ka Antonio Rudiger, bituma uyu myugariro w’Umudage ashyamirana n’uriya munya-Uruguay wahise amusunika.
Si bwo bwa mbere Suarez yari agaragaye ashotora umukinnyi w’ikipe bahanganye, kuko nko muri 2013 yagaragaye aruma myugariro Branislav Ivanovic wa Chelsea bigatuma ahagarikwa imikino 10 adakina.
Ni mbere y’uko muri 2014 yongera kuruma myugariro w’Umutaliyani, Jorgio Chiellini bigatuma ahagarikwa amezi atandatu adakina.
Uretse kuba yarumye Rudiger, Suarez yanagaragaye anashotora Cesar Azpilicueta (yateze bikarangira amusabiye guhanwa nyuma yo kwihusha) cyo kimwe na Callum Hudson-Odoi.
Abakoresha imbuga nkoranyambaga bataramiye kuri Luis Suarez, bagaragaza ko imyitwarire ye yo gushotora abakinnyi b’amakipe aba ahanganye na yo itazamucikaho.
Kurikira ibiganiro n’amavidewo binyura kuri Bwiza TV
