Perezida Joe Biden wa Leta zunze Ubumwe za Amerika, ejo ku wa Kane yafatiye ibihano Uburusiya kubera icyo yise ibitero byabwo byifashishije ikoranabuhanga n’ibindi bikorwa bigayitse. Perezidansi ya Amerika yatangaje ko ibihano Perezida Biden yafatiye bamwe mu bayobozi b’Uburusiya na bimwe mu bigo byo muri kiriya gihugu, bigamije gukumira ibikorwa bibi icyo gihugu gikorera mu mahanga. Itangazo rya White House rivuga ko iperereza ryagaragaje ko Uburusiya ari bwo bwihishe inyuma y’ibitero byifashishije ikoranabuhanga bizwi nka SolarWinds Amerika yagabweho mu mwaka ushize, ndetse rinashinja iki gihugu kwivanga mu matora ya Amerika yo muri 2020. Mu kwezi gushize Amerika bwo yari yatangaje ko ishobora gufatira ibihano abategetsi barindwi b’Uburusiya n’ibigo byabwo birenga 10, bashinjwa kuroga Alexei Navalny utavuga rumwe n’ubutegetsi bwa Perezida Vladimir Putin. Perezida Joe Biden ku wa Kane yatangaje ko icyemezo cye cyo gufatira ibihano Uburusiya gikwiye. Biden aganira n’itangazamakuru, yunzemo ati: “Nari nzi neza ko Perezida Putin ko twashoboraga kujya kure, ariko nahisemo kutabikora. Amerika ntabwo ishaka gutangiza urujya n’uruza rw’amakimbirane n’Uburusiya.” Perezida Biden yavuze ko hakenewe inzira y’ibiganiro hagati y’igihugu cye n’Uburusiya mu rwego rwo gukemura ibibazo ibihugu byombi bisanzwe bifitanye. Ku wa Kabiri w’iki Cyumweru bwo Perezida Biden aganira na Putin, yarahiriye kurinda inyungu za Amerika yemye. Amerika yafatiye Uburusiya ibihano mu gihe bwakunze guhakana ibirego byose bushinjwa, buvuga ko ntaho buhuriye na byo. Kurikira ibiganiro n’amavidewo binyura kuri Bwiza TV
