U Bufaransa: Abasirikare bakomeye basabiwe gukurirwaho ikirego kuri ‘jenoside’ mu Rwanda

Iki kirego cyatanzwe n’abantu batandatu barokokeye jenoside mu Bisesero mu burengerazuba bw’u Rwanda mu Kuboza 2005, bashinja aba basirikare kubasiga mu maboko y’abicanyi.

Komisiyo y’Igihugu ishinzwe kurwanya jenoside, CNLG, na yo ishinja gutererana Abatutsi bo mu Bisesero. Mu nyandiko yasohoye tariki ya 7 Nyakanga 2020, yagize iti: “Kudatabara Abatutsi byabaye ikosa rikomeye kuri operasiyo Turquoise. Kuba abasirikare b’Abafaransa barageze mu Bisesero ku wa 27 Kamena 1994, byatumye Abatutsi bari bararokotse ubwicanyi bigaragaza nyuma, 2000 muri bo baricwa.”

Aba bashinjacyaha basaba ko iki kirego cyakurwaho, bashingiye ku bikubiye muri ‘Raporo Duclert’ iherutse gusohoka muri Werurwe 2021, isobanura uruhare rw’u Bufaransa kuva mu 1990 kugeza mu 1994; mu itegurwa n’ishyirwa mu bikorwa rya jenoside yakorewe Abutsi.

Raport Duclert yagaragaje ko u Bufaransa bwakomeje gutera inkunga Leta yariho muri icyo gihe kandi bubona ibimenyetso by’uko mu bihe byari imbere hashoboraga kuba jenoside.

Abasirikare b’Abafaransa 22 bari mu gihugu muri ‘Operation Turquoise’ ni bo bavugwa muri iki kirego. Muri bo harimo General Jacques Lanxade wari Umugaba w’Ingabo, Lt Col Michel Robardey, Gen. Jean Claude LaFourcade wari uyoboye iyi operasiyo, Capt. Marin Gillier, Col. Rosier na Capt. Paul Barril.

Radiyo Mpuzamahanga y’Abafaransa (RFI) ivuga ko muri iki kirego, abasirikare batanu ari bo bakozweho iperereza gusa ntibigeze bagezwe imbere y’ubutabera.

Kurikira ibiganiro n’amavidewo binyura kuri Bwiza TV