Mu mpera z’icyumweru gishize mu gihugu cya Uganda hatangajwe amakuru y’imirwano ikaze yabaye hagati y’ingabo za leta n’abarinzi b’umwami Charles Wesley Mumbere yabereye mu gace ka Kasese ari nako uyu mwami asanzwe atuyemo; iza gusiga abasaga 55 bahasiga ubuzima mu ijoro ryo kuwa gatandatu rishyira ku cyumweru.
Kuri uyu wa kane tariki ya 1 Ukuboza 2016, polisi y’iki gihugu yeretse abanyamakuru urugo rw’umwami inabasobanurira ibyo gushya kwarwo hafi ya rwose uretse inzu imwe yasigaye bivugwa ko ariyo umwami yararagamo; izindi za gakondo zubatswe n’ibyatsi zose zabaye umuyonga.
[xyz-ihs snippet=”google-pub”]
Izi nzu za gakondo zatwitswe, bimwe mu byasanzwe byahiriyemo ni nk’ ibikoresho bikoreshwa mu gikoni; imyambaro itacyambarwa n’ibindi bitandukanye bigaragara nk’ibigikoreshwa.
Inzu y’ibanze yubatse mu buryo bugezweho iriho n’ikirangantego niyo yasigaye ihagaze mu gihe utundi turururi bivugwa ko ari two twabagamo abarinzi b’umwami wamaze gutabwa muri yombi n’inzego z’umuteka twahindutse umuyonga; nkuko Chimpreports ibitangaza.
Aganira n’itangazamakuru kuri uyu wa kane, umuvugizi w’igipolisi Andrew Felix Kaweesi ari nawe wayoboye abanyamakuru kuri iyi nzu ari naho habereye ibyaha; yavuze ko mu minsi mike bagiye kuva kuri iyi nzu bakayisubiza beneyo.
Kaweesi yagize ati, “Mumbere ni umuntu ku giti cye wagize uruhare mu gukora ibyaha kandi ntabwo dushobora gufunga ahantu nk’aha haranga umuco, nta n’ikindi dufite twahakoresha igihe ibi byose bizaba birangiye; uretse kubahamagara tukabasubiza ibyabo.”
Umuvugizi wa polisi kandi yahakanye amakuru yavugaga ko izi nzu zateweho amabombe aremereye, avuga ko ari ibinyoma bidafite ishingiro kuko iyo bakoresha bombe n’inzu nyirizina yasigaye ari mutaraga yari kuba yangiritse.
[xyz-ihs snippet=”google-pub”]
Yasobanuye ko icyatwitse izi nzu zari zubatse mu byatsi, ari umuriro wakoreshwaga mu guteka n’aba barinzi b’umwami; waje gutizwa umurindi n’ibisasu bikoze muri peteroli bari bafite.
Kanda hano ujye ubona amakuru yihuse kandi kugihe kuri Facebook no kuri twitter
Theogene U @Bwiza.com
