Minisitiri w’Ubuzima, Dr Daniel Ngamije yavuze ko hari ibimenyetso simusiga byerekana ko Covid-19 yihinduranyije yahawe izina rya Delta yabonetse bwa mbere mu Buhinde, iri mu Rwanda.
Minisitiri Ngamije yabitangarije kuri RBA kuri uyu wa 8 Nyakanga 2021, agira ati: “Uko bigaragara, ibipimo turi gufata biri kutwereka ibimenyetso simusiga ko Delta Variant ihari mu Rwanda, turabibona.”
Yakomeje asobanura ko iyo uganiriye n’abaganga, ukareba ibimenyetso abarwayi b’iki cyorezo bagaragaza, usanga Delta iri mu Rwanda. “N’ubukana bw’indwara n’iyo uganiriya n’abaganga ukuntu bavugana n’abarwayi, araza akakubwira ati ‘umurwayi w’ubu ngubu wa Covid-19, aza afite ibindi bimenyetso tutakundaga kumva mbere, aho dusuzumira abarwayi.”
Muri ibi bimenyetso bidasanzwe harimo kuribwa mu mutwe mu buryo bukabije. Yabivuze ati: “Bamwe baza bakubwira ko bafite umutwe ukabije, ni ubwa mbere twumvise icyo kimenyetso, bakakubwira ukuntu baba bananiwe cyane, guhumeka bigoye…Bivuze ngo ni bwa bukana bw’iyi Covid, Delta Variant.”
Minisitiri Ngamije kandi yavuze ko ashingiye ku buryo abantu bari kwandura Covid-19 ku bwinshi muri iki gihe, bakagera muri 800, ari ikindi kimenyetso cyerekana ko Delta iri mu Rwanda.
Covid-19 ya Delta izwiho kwandura mu buryo bwihuse, ikazahaza cyane cyane abari mu za bukuru n’abasanzwe barwaye izindi ndwara.
