Byibuze abaturage 16 barimo abagore batandatu n’abana babiri mu ijoro ryo kuri uyu wa Kane ushize biciwe mu gitero cyagabwe kuri bus yari itwaye abagenzi aho bikekwa ko cyagabwe n’inyeshyamba za ADF mu majyaruguru y’uburasirazuba bwa Repubulika ya Demokarasi ya Congo nk’uko byatangajwe kuri uyu wa Gatanu n’umuyobozi w’ibitaro muri iki gice cyo muri Beni.
Iki gitero cyabereye ku muhanda uri hafi y’Umujyi wa Oicha, mu birometero 390 ugana mu majyaruguru y’Umujyi wa Goma. Abandi bantu 9 bakomeretse barimo umwana w’uruhinja umerewe nabi cyane.
Abarokotse iki gitero bashyize mu majwi umutwe wa ADF ugizwe n’intagondwa zikorana n’umutwe w’iterabwoba wa Islamic State. Uyu mutwe kuva mu 2014 ukaba ushinjwa kuba umaze kwica abantu babarirwa mu bihumbi.
Nubwo bivugwa gutya, iyi nkuru dukesha Reuters iravuga ko nta muntu wigambye iki gitero na ADF ntacyo iratangaza.
Uwitwa Masika Kahindo, umwe mu barokotse iki gitero, avuga ko yari kumwe n’umwana we w’umuhungu w’imyaka 11, ubwo inyeshyamba zambaye impuzankano nk’iza ADF zarasaga ku modoka yari yuzuyemo abagenzi zikica umwana we.
Ati “ Barashe amasasu menshi umushoferi ahita apfa,” Uyu yavuze ibi nawe yambaye bande mu gatuza aho isasu ryamuhushuye. Avuga ko umwana we bamusihoye mu modoka bakamurasa mu mutwe.
Janvier Kasayiro, uypobora ihuriro rya sosiyete sivile zo muri Oicha, nawe yashinje ADF kuba inyuma y’iki gitero ashimangira ko abantu benshi bari muri iyi bus yarashweho baburiwe irengero bataraboneka.
Kurikira ibiganiro n’amavidewo binyura kuri Bwiza TV
