Abantu 21, barimo abajenerali, abasirikare n’abapolisi bamaze gutabwa muri yombi muri Madagascar mu rwego rw’iperereza ku mugambi wo gushaka kwica Perezida Andry Rajoelina.
“Abandi bantu bashya bavugwa muri uyu mugambi bafatiwe muri Madagascar nyuma y’umushinga wo gushaka kwica Perezida Andry Rajoelina,” ibi byatangajwe kuri iki Cyumweru, itariki ya 01 Kanama n’Umushinjacyaha Mukuru Berthine Razafiarivony.
“Ku mushinga wo kwica perezida wa repubulika, kugeza uyu munsi abantu 21 batawe muri yombi kandi bari gukorwaho iperereza,” ibi umushinjacyaha mukuru yabitangarije abanyamakuru.
Yongeyeho ko mu bantu batawe muri yombi “12 ari abasirikare n’abajandarume bari mu kazi barimo abajenerali batanu, abakapiteni babiri na ba sous-officiers batanu,”
Ngo harimo kandi abajandarume bane n’abasirikare basezerewe mu kazi barimo abanyagihugu n’abanyamahanga ndetse n’abasivili batanu.
Mu bafashwe kandi harimo abafaransa babiri ndetse n’Umunyamerika ukuriye ikigo gikomeye cy’ubucukuzi bwa peteroli kitwa Madagascar Oil, bafashwe bakekwaho kugira uruhare muri iki gikorwa cyo gushaka kwivugana Perezida Rajoelina.
Andry Rajoelina, w’imyaka 47, yagiye ku butegetsi muri Werurwe 2009 abifashijwemo n’igisirikare. Yatsinze amatora aheruka mu Ukuboza 2018 atsinze Marc Ravalomanana yasimbuye ku butegetsi mu matora yavuzwemo uburiganya.
