Muri Uganda, Urukiko Rushinzwe Kurinda Iremezo ry’Itegeko Nshinga rwakuyeho itegeko rirwanya kureba amashusho y’urukozasoni (Pornography) ryatangiye gukurikizwa guhera mu 2014, harimo ingingo zimwe na zimwe nko kubuza kwambara utujipo tugufi (miniskirt) zamaganwe n’imiryango itegamiye kuri Leta.
Nk’uko icyemezo cyashyizwe ahagaragara kuri uyu wa Mbere, iryo tegeko hemejwe ko “ridahuye cyangwa rinyuranyije n’itegeko nshinga”.
Mu cyemezo cye nk’uko tubikesha Naironinews, umucamanza Frederick Egonda-Ntende yagize ati: “Ingingo (…) z’itegeko rirwanya porunogarafiya zitangajwe ko ari impfabusa.”
Itegeko ryo muri Gashyantare 2014 ryarwanyaga porunogarafiya, kandi rigahana, imyitwarire n’ibikorwa biganisha ku busambanyi nko kwambara amajipo magufi cyangwa amagambo y’indirimbo bigaragara ko arimo gutinyuka gukabije.
Amashyirahamwe aharanira uburenganzira bw’umugore yakoze ubukangurambaga mu myaka yashize bwo gusaba ko iri tegeko, bise iryo kurwanya utujipo tugufi, rikurwaho, bamagana ihohoterwa rikorerwa abagore bambaye imyenda ifatwa nk’iy’urukozasoni.
Lillian Drabo, wari mu mashyirahamwe icyenda y’abikorera ku giti cyabo bamaganye iri tegeko mu butabera yagize ati: “Byabaye intambara itoroshye kandi twishimiye ko abizera uburenganzira bw’umugore batsinze.”
Kurikira ibiganiro n’amavidewo binyura kuri Bwiza TV
