Ubutabera bwa Burkina Faso bwemeje ko ku itariki ya 11 Ukwakira 2021 ari bwo buzatangira urubanza ku iyicwa rya Thomas Sankara na bagenzi be 12, ruregwamo Blaise Compaore wahoze ari perezida w’iki gihugu.
Ibi byatangajwe n’ubushinjacyaha bwa gisirikare mu Rukiko rwa Gisirikare rwa Ouagadougou mu itangazo ryashyizwe ahagaragara kuri uyu wa Kabiri.
Iri tangazo rikomeza rivuga ko uru rubanza ruzabera mu ruhame ahazwi nka Banquets de Ouaga 2000 nk’uko byagenze mu rubanza rwo kugerageza guhirika ubutegetsi rwo mu 2015.
Iyi dosiye y’urubanza rwa Thomas Sankara yagize impinduka zikomeye muri Mata umwaka ushize ubwo ubutabera bwa gisirikare bwemezaga ibirego kandi bugashinja abantu 14 nk’uko iyi nkuru dukesha France24 ivuga.
Mu baregwaga harimo uwahoze ari Perezida Blaise CompaorĂ©, ufatwa nk’uwateguye kandi akaba yaragiriye inyungu nyinshi mu iyicwa rya Sankara wafatwaga nk’umubyeyi w’impinduramatwara ya Burkina Faso.
Muri uru rubanza, Blaise CompaorĂ©, ubu uri mu buhungiro muri CĂ´te d’Ivoire, akurikiranyweho icyaha cyo kwibasira umutekano w’igihugu, ubufatanyacyaha mu bwicanyi no guhisha imirambo.
Undi muntu w’ingenzi uvugwa muri iyi dosiye ni Gen. Gilbert Diendéré wamaze gukatirwa kubera kugerageza guhirika ubutegetsi bw’inzibacyuho bwari buyobowe na Michel Kafando mu 2015.
Kurikira ibiganiro n’amavidewo binyura kuri Bwiza TV
