Burundi: Ubuzima bwa Minisitiri w’Intebe Bunyoni bwaba butifashe neza cyangwa ari kwegezwayo?

Nyuma y’aho hakomeje kuvugwa amakuru y’uko ubuzima bwa minisitiri w’Intebe w’u Burundi bwaba butifashe neza, Perezida Evariste Ndayishimiye aherutse gushyira umukono ku itegeko riha minisitiri w’umutekano uburenganzira bwo gutegura inama y’abaminisitiri no gukurikirana ibikorwa bya leta mu gihe Minsistiri w’intebe yaba adahari.

Abakurikiranira hafi politiki y’u Burundi barasanga iri tegeko rije kugaragaza umucyo ku bibazo n’amakenga Abarundi benshi bafite muri iki gihe ku buzima bwa Minisitiri w’Intebe, Guillaume Bunyoni uheruka kugaragara mu bikorwa bya leta ku itariki ya 19 Nyakanga 2021.

Ibi ngo bikaba bivuze ko mu gihe hategerejwe ko Guillaume Bunyoni azasubira mu kazi, minisitiri w’umutekano, Gervais Ndirakobuca, ari we ugiye kuba ategura imirimo y’inama y’abaminisitiri n’ibindi bikorwa bya guverinoma.

Minisitiri w’Intebe, Guillaume Bunyoni bivugwa ko aheruka kugaragara mu kazi ku itariki ya 19 Nyakanga 2021 ubwo yari ayoboye inama yateguraga inama y’abaminisitiri.

Kuva icyo gihe nk’uko iyi nkuru dukesha urubuga Ubmnews rwo mu Burundi ivuga, nta makuru ajyanye n’uko ubuzima bwe bwfashe yigeze atangazwa cyangwa ngo hatangazwe ibyo yaba ahugiyemo.

Ibi biravugwa kandi mu gihe hari n’amakuru aturuka mu ishyaka CNDD-FDD avuga ko Perezida Ndayishimiye yari arimo kugerageza kwikuraho agatsiko k’ibihangange muri iri shyaka byica bigakiza ndetse bishobora gutuma guverinoma iyobowe na Bunyoni ihindurwa hagashyirwaho indi yaba iyobowe n’umuntu wizewe na Ndayishimiye ubwe.

Kurikira ibiganiro n’amavidewo binyura kuri Bwiza TV