Uwahoze ari Perezida wa Tchad, Hissène Habré, yapfiriye muri gereza yari afungiyemo mu gihugu cya Senegal ku myaka 79 y’amavuko. Yari afungiye muri iyi gereza nyuma yo gukatirwa igifungo cya burundu mu 2016 kubera ibyaha byibasiye inyokomuntu nk’uko byatangajwe kuri uyu wa kabiri.
Ibinyamakuru byo muri Senegal byatangaje ko uyu mugabo wigeze kuyoboza Tchad inkoni y’icyuma yishwe na Covid-19.
Hissène Habré Yayoboye iki gihugu kuva mu 1982 kugeza mu 1990 mbere yo guhirikwa ku butegetsi na nyakwigendera Idriss Deby.
Yahungiye muri Senegal ari naho yafatiwe mu 2013, nyuma y’imyaka 3 mu 2016 akatirwa nyuma yo kumuhamya ibyaha byibasiye inyokomuntu, gufata ku ngufu, ubwicanyi, gukoresha ubucakara no gushimuta.
Komisiyo ishinzwe iperereza ya Tchad yabaruye abantu 40,000 baguye mu maboko y’ubutegetsi bwe.
