Mwimane u Rwanda_Sadate asaba APR FC irahura na Mogadishu City

Sadate yatanze ubu butumwa asubiza iyi kipe yaraye itangaje ko yasoje imyitozo ya nyuma mbere yo guhura n’iyi kipe yo muri Somalia. Ubutumwa yanyujije kuri Twitter bugira buti: “Twifurije intsinzi ikipe y’ingabo z’igihugu, APR FC. Mwimane u RDA.”

Ntabwo biba bisanzwe kubona umufana wa Rayon Sports ashyigikira mukeba, APR FC, yewe hari benshi berura bakavuga ko bashyigikiye izo mu mahanga zikina nayo.

Urugero ni uwitwa Mugabe wamusubije ati: “Aho kuyifana nafana Mogadishu. Mbihagazeho nta munsi nzafana APR na rimwe” n’undi witwa Gihozo Ange wamubwiye ati: “Kdi koko menye ufana APR ukaba utwihishemo peee!!!”

Gusa Sadate birasa n’aho yarenze iyi myumvire kuko muri iyi minsi yagaragaje ko ashyigikira buri kipe iserukira u Rwanda, mu mukino uwo ari wose. Urugero ni iyahagarariye igihugu mu irushanwa nyafurika rya Basketball, Afrobasket, n’aya Volleyball.

Sadate kandi ni umwe mu bashimiye AS Kigali nyuma yo kunyagira Olympique de Missiri yo muri Comores ibitego 6-0, mu mukino wa kabiri wa CAF Confederations Cup wabereye i Kigali kuri uyu wa 18 Nzeri 2021.

Ubutumwa bushimira A.S Kigali yabwanditse kuri Twitter agira ati: “Félicitation kuri AS Kigali FC ku ntambwe ya mbere muteye, mukomereze aho. Urugendo uko rwiyongera ni ko rurushaho gukomere ariko icy’ibanze ni uko mufite ubushake.”

Tariki ya 13 Nzeri 2021 nabwo Sadate yagaragaje ko atishimiye uburyo APR FC itahawe penaliti ku mukino wa mbere na Mogadishu City wabereye muri Djibouti. Icyo gihe yagize ati: “Mu mukino wahuje APR na Mogadishu City ndahamya ko APR itabaniwe ubwo bayimaga penalite igaragarira buriw wese, ibi byitwa gutegura. Pole sana bavandimwe bacu bo muri APR FC.”

Ku munsi wakurikiyeho, Sadate yasabye abadakunda APR FC kureka urwango rutuma amaso yabo atabona ko iyi kipe yagombaga guhabwa penaliti, yongeraho n’amafoto ashyigikira ibyo avuga. Ati: “Mureke tureke kwangana cyane kugera aho amaso abona ibitari byo.”

Umukino ubanza wabaye tariki ya 12 Nzeri, APR FC na Mogadishu City zinganya ubusa ku bundi (0-0). Iyi kipe y’ingabo yasobanuye ko uyu musaruro ‘utari mubi’ yawutewe n’ubushyuhe bukabije (bwari kuri dogero 43), yarahiriye gutsinda uyu mukino wa kabiri cyane ko iraba ikinira ku kirere cyiza imenyereye.